சென்னை இரவை நடுங்கவிட்ட கொடூரன்.. வக்காலத்து வாங்கிய தாயை அலறவிட்ட பெண்

சென்னை இரவை நடுங்கவிட்ட கொடூரன்.. ஒரே காரால் 5 இடங்களில் 5 விபத்துகள்.. வக்காலத்து வாங்கிய தாயை அலறவிட்ட பெண்

சென்னை நீலாங்கரை பகுதியில் போதையில் காரை ஓட்டி வந்த இளைஞர், அடுத்தடுத்து 5 வாகனங்கள் மீது மோதி விபத்தை ஏற்படுத்தியதால் பரபரப்பு ஏற்பட்டது.

நாடு முழுவதும் தீபாவளி பண்டிகை கொண்டாடிக் கொண்டிருந்த இரவு நேரத்தில், சென்னை திருவான்மியூரில் இருந்து மாமல்லபுரம் நோக்கி சென்று கொண்டிருந்த அந்த காரை, அந்த இளைஞர் அதிவேகமாக ஓட்டிச் சென்றார்.

அந்த இளைஞர், சாலையில் இருசக்கர வாகனத்தில் சென்று கொண்டிருந்த ஒரு முதியவரை இடித்து விட்டு சென்றுள்ளார். இதைப் பார்த்த விக்னேஷ் என்ற உணவு டெலிவரி ஊழியர், காரில் இருந்த இளைஞரிடம் கூறியபோது, அவர் இதையெல்லாம் கண்டுகொள்ளாமல், விக்னேஷின் இருசக்கர வாகனம் மீது பலமாக மோதியுள்ளார். இதில் நிலை தடுமாறி கீழே விழுந்த விக்னேஷ் சுதாரித்து எழுந்து, அந்த இளைஞரை விரட்டிச் சென்றார்.

இதையறிந்த அந்த இளைஞர் அங்கிருந்து தப்பிப்பதற்காக வேகமாக ஒருவழிப் பாதையில் தவறாக சென்று, சாலையோரம் நிறுத்தி வைக்கப்பட்டிருந்த 3 கார்கள் மீது அடுத்தடுத்து மோதி நின்றது.

இந்த விபத்தில் காரின் முன்பகுதி சேதமடைந்துள்ள நிலையில், அதில் வந்த இளைஞர் சுயநினைவின்றிக் கிடந்தார். அவர் மதுபோதையில் இருந்ததாக தெரிகிறது.

இதையடுத்து, பாதிக்கப்பட்டவர்கள் காரை சூழ்ந்து கொண்டு அந்த இளைஞரிடம் வாக்குவாதம் செய்தனர்.

அங்கு வந்த இளைஞரின் தாயாரிடம், விக்னேஷின் தாயார் முறையிட்டார். அவர்களை போலீசார் சமாதானபடுத்தி அனுப்பி வைத்தனர்.

போதையில் ஒரு விபத்தை ஏற்படுத்தி விட்டு, அங்கிருந்து தப்பிக்க முயன்று மீண்டும் பல விபத்துகளை ஏற்படுத்தி பிடிபட்ட அந்த இளைஞரிடம் நீலாங்கரை போலீசார் விசாரணையைத் தொடங்கியுள்ளனர்.