முதல் முயற்சியிலேயே சாதனை படைத்த மனவளர்ச்சி குன்றிய சிறுவர்கள்

செங்கல்பட்டு மாவட்டம் கல்பாக்கத்தில், மனவளர்ச்சி குன்றிய 3 சிறுவர்கள், 10ஆம் வகுப்பு தேர்வு எழுதி அனைத்து பாடத்திலும் தேர்ச்சி பெற்று அசத்தியுள்ளனர்.

செங்கல்பட்டு மாவட்டம், கல்பாக்கத்தை அடுத்த ஆயப்பாக்கம், பெருந்துறை, நல்லூர் கிராமங்களை சேர்ந்தவர்கள் சரண்ராஜ், வசந்த் மற்றும் பிரபாகரன். மனவளர்ச்சி குன்றிய இந்த மூன்று சிறுவர்களும், வருமைக் கோட்டுக்கு கீழ் ஏழ்மையான குடும்பத்தை சேர்ந்தவர்கள் என்பதால், வீட்டிலேயே பூட்டி வைத்துவிட்டு, பெற்றோர் வேலைக்கு சென்று வந்துள்ளனர். வீடுகளில் அடைபட்டுக் கிடந்த இந்த மூன்று பேரையும், தேசிங்கு என்பவர் கல்பாக்கத்தில் உள்ள மனவளர்ச்சி குன்றியோர் பள்ளியில் சேர்ந்துள்ளார். பெண் பயிற்சியாளரையும் நியமித்து, 10ஆம் வகுப்பு பாடங்களும் பயிற்றுவித்தார். நன்றாக படித்த மூன்று சிறுவர்களும், புதுப்பட்டினம் அரசுப் பள்ளியில் 10ஆம் வகுப்பு தேர்வு எழுதி, முதல் முயற்சியிலேயே அனைத்து பாடங்களிலும் தேர்ச்சி பெற்றனர். அடுத்த‌தாக, 11 மற்றும் 12ஆம் வகுப்பு தேர்வுகள் எழுதி பட்டப்படிப்பு படிக்க உள்ளதாக தெரிவித்தனர். ஞாபகத்திறன், கூர்ந்து கவனிக்கும் ஆற்றல், எழுத்துதிறன், தன்னம்பிக்கை மூலம் செங்கல்பட்டு மாவட்டத்திலேயே 10-ம் வகுப்பு தேர்ச்சி பெற்று சாதனை படைத்த மனவளர்ச்சி குன்றிய மாணவர்கள் இவர்கள் மட்டுமே என்பது குறிப்பிடத்தக்கது.