ஆம்ஸ்ட்ராங் கொலையில் தொடர்புடைய பிரபல ரவுடி மீது மேலும் ஒரு வழக்கு

ஆம்ஸ்ட்ராங் கொலை வழக்கில் தேடப்படும் பிரபல கூலிப்படை தலைவன் சீசிங் ராஜா மீது போலீசார் மேலும் ஒரு வழக்குப் பதிவு செய்து தீவிரமாக தேடி வருகின்றனர்.

சென்னை பல்லாவரத்தை சேர்ந்தவர் பிரபல ரவுடி சீசிங் ராஜா.

இவர் மீது கொலை, ஆள்கடத்தல் உள்ளிட்ட 10க்கும் மேற்பட்ட வழக்குகள் சென்னை உள்பட பல்வேறு மாவட்டங்களில் நிலுவையில் உள்ளன. மறைந்த பிரபல ரவுடி ஆற்காடு சுரேஷின் கூட்டாளியான இவரை, ஆம்ஸ்ட்ராங் கொலை வழக்கில் போலீசார் தீவிரமாக தேடி வருகின்றனர். போலீசாரின் நெருக்கடி காரணமாக ஆந்திராவுக்கு தப்பி ஓடிய அவர் அங்கிருந்து, தனது கூட்டாளிகள் மூலம் சென்னையில் பல்வேறு குற்ற சம்பவங்களில் ஈடுபட்டு வந்துள்ளார். இந்நிலையில் வேளச்சேரி பகுதியில் பார் ஊழியர் ஆனந்தன் என்பவரை மிரட்டி பணம் கேட்டதாக, பார் ஊழியர் அளித்த புகாரின்பேரில் சீசிங் ராஜா மீது வேளச்சேரி போலீசார் வழக்குப் பதிவு செய்துள்ளனர். தொடர்ந்து தலைமறைவாக உள்ள அவரை தனிப்படை அமைத்து போலீசார் தீவிரமாக தேடி வருகின்றனர்