சட்டை அணியாமல் நடுரோட்டில் சேட்டை.. பெண்கள் முன் ஆபாச செய்கை - பொதுமக்கள் பிடித்து தகுந்த கவனிப்பு!

கலைஞர் குடியிருப்பு, சுவாமிநாதபுரம், மாதவபுரம், ஆகிய பகுதிகளில் இன்று அதிகாலை வீட்டு வாசல்களில் பெண்கள் கோலம் போட்டுக் கொண்டிருந்தனர்... அப்போது அங்கு அரைகுறை ஆடையுடன் வந்த இளைஞர் ஒருவர் ஆபாச நடவடிக்கைகளில் ஈடுபட்ட நிலையில், அதைக் கண்டு அதிர்ச்சி அடைந்து பெண்கள் கூச்சலிட்டு அலறியடித்து ஓட்டம் பிடித்தனர். இதனால் அங்கிருந்து ஓடிய அந்த நபர் விவேகானந்தபுரம் பகுதியில் சாலையில் சென்று கொண்டிருந்த வாகனங்களின் கண்ணாடிகள் மீது கற்களை தூக்கி எறிய முற்பட்டார். மேலும் சாலையோரம் நடந்து சென்று பெண்களிடமும் ஆபாச செய்கை செய்தார். இதை கவனித்துக் கொண்டிருந்த அப்பகுதி பொதுமக்கள் அந்த இளைஞரைப் பிடித்து தாக்கினர்... தொடர்ந்து அவரிடம் விசாரித்த போது அந்த இளைஞர் கேரள மாநிலம் எர்ணாகுளத்தைச் சேர்ந்தவர் என்பதும், வீட்டில் தகராறு செய்து விட்டு கன்னியாகுமரிக்கு வந்து இரவு முழுவதும் அதிக மது குடித்ததால் போதை தலைக்கேறி இது போன்ற செயல்களில் ஈடுபட்டதும் தெரிய வந்துள்ளது. இதையடுத்து அந்த இளைஞரை பொதுமக்கள் எச்சரித்து அனுப்பினர்.