சிவசங்கர் பாபா விவகாரம் - 5 பேருக்கு முன்ஜாமின்

கேளம்பாக்கத்தில் உள்ள சுஷில் ஹரி பள்ளியில் மாணவிகளிடம் அத்துமீறியதாக பள்ளியின் நிறுவனர் சிவசங்கர் பாபா கைது செய்யப்பட்டார். இந்த வழக்கில் தேடப்பட்டு வந்த, பள்ளியின் ஆங்கில ஆசிரியை தீபா வெங்கட்ராமன், பள்ளி நிர்வாகி  ஜானகி சினிவாசன், பக்தைகள்  கருணாம்பிகை, திவ்யா மற்றும் பாரதி ஆகியோர் முன் ஜாமின் கோரி சென்னை உயர்நீதிமன்றத்தில் மனு தாக்கல் செய்திருந்தனர். 

இந்த மனுக்கள்  நீதிபதி எம்.தண்டபாணி முன்பு இன்று விசாரணைக்கு வந்தன. அப்போது, இந்த வழக்கில் மாஜிஸ்திரேட் நீதிமன்றத்தில்  பதிவு செய்யப்பட்ட வாக்குமூலத்தை அறிக்கையாக  காவல்துறையினர் தாக்கல் செய்தனர்.இதனை பதிவு செய்த நீதிபதி, சிவசங்கர் பாபா மீதான குற்றச்சாட்டுகளில் இவர்களுக்கு எந்த நேரடி  தொடர்பும் இல்லை என கூறி , ஐந்து பேருக்கும் நிபந்தனை முன் ஜாமின் வழங்கி உத்தரவிட்டார்.அதன்படி, 2 வாரங்களுக்கு ஐந்து பேரும் சிபிசிஐடி முன் ஆஜராகி கையெழுத்திட வேண்டும் எனவும் தங்களுடைய பாஸ்போர்ட்டை விசாரணை நீதிமன்றத்தில் ஒப்படைக்க வேண்டும் எனவும்  நீதிபதி, நிபந்தனை விதித்து உத்தரவிட்டார்.