திருமணத்தில் பங்கேற்க இ பாஸ் இல்லாமல் வந்த புதுமாப்பிள்ளை - முகாமில் தனிமைப்படுத்திய போலீசார்

சென்னையில் இருந்து இன்று நடைபெற இருந்த திருமணத்தில் பங்கேற்க இ பாஸ் இல்லாமல் காரில் வந்த மாப்பிள்ளை மற்றும் 2 பெண் போலீஸ் உள்பட 7 பேரை போலீசார் தனிமைப்படுத்தினர். கோவில்பட்டியை அடுத்த தோட்டிலோவன்பட்டி சோதனைச் சாவடியில் சென்னையில் இருந்து வந்த ஒரு வாகனத்தை நிறுத்தி போலீசார் சோதனையிட்டனர். அதில் சென்னை புழல் பகுதியில் இருந்து 7 பேர் கோவில்பட்டியில் உள்ள சுப்பிரமணியபுரத்திற்கு சென்று கொண்டிருந்தது தெரியவந்தது. அப்போது நடத்திய ஆய்வில் கார் உரிய அனுமதி சீட்டு இல்லாமல் சென்னையில் இருந்து வந்தது தெரியவந்தது.மேலும் விசாரணையில் காரில் வந்த 32 வயதுடைய சாப்ட்வேர் இன்ஜீனியருக்கும், கோவில்பட்டியையடுத்த ஆவல்நத்தத்தைச் சேர்ந்த பெண்ணுக்கும், கழுகுமலை கழுகாசலமூர்த்தி கோயில் முன்பு திருமணம் நடைபெற இருப்பதும் தெரியவந்தது. மேலும் காரில் புது மாப்பிள்ளை, சி.ஆர்.பி.எப்பில் பணிபுரியும் அவரது அண்ணன், சென்னையில் பணிபுரியும் 2 பெண் போலீஸ் மற்றும் 3 குழந்தைகள் வந்தது தெரியவந்தது. இதனையடுத்து புது மாப்பிள்ளை உள்பட 7 பேரும் கோவில்பட்டியிலுள்ள முகாமிற்கு அழைத்துச் சென்று தனிமைப்படுத்தப்பட்டனர்.