"மெரினாவில் ரூ.27.4 கோடியில் 900 வண்டிக்கடைகள்"
சென்னை மெரினா கடற்கரையில் 27 கோடி ரூபாய் செலவில் 900 வண்டிக்கடைகள் அமைத்து கொடுக்கப்படும் என சென்னை உயர்நீதிமன்றத்தில், மாநகராட்சி தெரிவித்துள்ளது.
சென்னை மெரினா கடற்கரை பகுதியில் மீன் வியாபாரிகளை ஒழுங்குபடுத்துவது, நடைபாதை வியாபாரிகள் சட்டத்தை கண்டிப்புடன் அமல்படுத்துவது தொடர்பான வழக்குகள், நீதிபதிகள் வினீத் கோத்தாரி, சுரேஷ்குமார் அமர்வில் விசாரணைக்கு வந்தன.
* அப்போது, சென்னை மாநகராட்சி ஆணையர் பிரகாஷ் தரப்பில் தாக்கல் செய்யப்பட்ட அறிக்கையில், மெரினா கடற்கரையில் தற்போது வரை ஆயிரத்து 962 கடைகள் உள்ளதாகவும்,
* தற்போது, அங்கு 900 கடைகளுக்கு மட்டும் அனுமதி வழங்க இருப்பதாகவும், அதற்காக, 27 கோடியே 4 லட்ச ரூபாய் செலவில், 900 வண்டிக்கடைகள் அமைத்துக் கொடுக்க உள்ளதாகவும் தெரிவிக்கப்பட்டுள்ளது.
* மெரினாவை சுத்தப்படுத்த 175 துப்புரவு பணியாளர்கள் சுழற்சி முறையில் ஈடுபடுத்தப்பட உள்ளதாகவும், 6 இடங்களில் நவீன கழிப்பிட வசதிகள் ஏற்படுத்த உள்ளதாகவும் தெரிவிக்கப்பட்டிருந்தது.
* கலங்கரை விளக்கம் அருகில் மீன் வியாபாரிகளுக்கு 66 லட்சம் ரூபாய் செலவில் 300 மீன் விற்பனை கடைகள் அமைக்கப்படுவதாகவும் அதில் சென்னை மாநகராட்சி தரப்பில் தெரிவிக்கப்பட்டது.
* இதை பதிவு செய்த நீதிபதிகள், உணவு பாதுகாப்பு விதிகளை மீறி செயல்படுபவர்கள், உணவு விற்பனைக்கான தர சான்று பெறாதவர்கள் மெரினாவில் கடைகள் நடத்த அனுமதிக்கவே கூடாது என எச்சரித்தனர்.
* மேலும், மெரினாவில் 900 கடைகள் அமைப்பதற்காக எடுத்த முடிவுகள் உள்ளிட்டவை குறித்து பதிலளிக்க கால அவகாசம் வழங்கி, விசாரணையை ஜனவரி 8 ஆ ம் தேதிக்கு தள்ளி வைத்தனர்.
Next Story
