மாமல்லபுரம் அர்ஜூனன் தபசு சாலையில் வாகனங்கள் செல்ல தடை

மாமல்லபுரம் முக்கிய புராதன சின்னங்கள் உள்ள பகுதியாக விளங்குகிறது. தற்போது இங்கு, சுற்றுலா வாகனங்கள் அதிகம் வருவதால், வாகனம் நிறுத்த இடம் இல்லாமல் தினமும் கடும் போக்குவரத்து நெரிசல் ஏற்படுகிறது. மேலும், வாகனங்களில் இருந்து வரும் புகையினால் சிற்பங்களில் தூசி படிந்து மாசு ஏற்படுகிறது. எனவே வாகன நெரிசலை கட்டுப்படுத்தவும், சிற்பங்கள் மீது மாசு ஏற்படாமல் தடுக்கவும், தொல்லியல் துறையின் பரிந்துரையின் பேரில் இன்று முதல் அர்ஜூனன் தபசு சாலையில் வாகன போக்குவரத்துக்கு தடை செய்யப்பட்டுள்ளது. இச்சாலையில் வாகனங்கள் செல்லாத வகையில் சாலையின் குறுக்கில் தடுப்புகளும் அமைக்கப்பட்டுள்ளன.