மின்னல் தாக்கி விவசாய கூலி தொழிலாளர்கள் 4 பேர் பலி

வைத்தூர் கிராமத்திலிருந்து செம்பாட்டூர் கீழமுட்டுக் காடு பகுதிக்கு 38 பெண்கள் விவசாய கூலி வேலைக்கு சென்றுள்ளனர். கடலை பறிக்கும் பணியில் அவர்கள் ஈடுபட்டபோது பலத்த மழை பெய்ததால் அருகில் இருந்த கூடாரம் ஒன்றில் நின்றுள்ளனர். அப்போது, பலத்த சப்தத்துடன் இடியும் மின்னலும் தாக்கியது. இதில், விஜயா, சாந்தி, லட்சுமி அம்மாள், கலைச்செல்வி ஆகிய 4 பெண்கள் உயிரிழந்தனர். 20க்கும் மேற்பட்டோர் படுகாயங்களுடன் புதுக்கோட்டை அரசு மருத்துவமனையில் அனுமதிக்கப்பட்டுள்ளனர்.  இந்நிலையில், உயிரிழந்தவர்களின் உறவினர்களையும், காயமடைந்தவர்களையும் புதுக்கோட்டை ஆட்சியர் உமா மகேஸ்வரி சந்தித்து ஆறுதல் கூறினார். அப்போது, முதலமைச்சர் நிவாரண நிதியை பெற்றுத் தர நடவடிக்கை எடுப்பதாக உறுதி அளித்தார்.