கணவனின் குடியை நிறுத்த முயன்ற மனைவி : கணவனுக்கு தாயத்து கட்டிய மனைவி விபத்தில் பலி

அரியலுார் மாவட்டம் ஆரோக்கியபுரம் பகுதியை சேர்ந்த பவுல்ராஜ் கூலி தொழிலாளி ஆவார். இவர் குடிப்பழக்கத்திற்கு அடிமையானதால், வேதனையடைந்த அவரது மனைவி ராதிகா மேரி, ஜோதிடர்களை அணுகியுள்ளார். ஜோதிடர்கள் நேரம் சரியில்லை என கூறியதால், தாயத்து கட்டுவதற்காக, குடும்ப நண்பர்களுடன், நாமக்கல் அருகே உள்ள கோவிலுக்கு சென்று திரும்பி கொண்டிருந்தார். சேலம்- சென்னை தேசிய நெடுஞ்சாலையில் வாழப்பாடி அடுத்த முத்தம்பட்டி அருகே கார் சென்று கொண்டிருந்த போது, கார் மீது லாரி மோதியது. இதில், ராதிகாமேரி, சின்னப்பராஜ், ராஜன் ஆகிய மூவரும் சம்பவ இடத்திலேயே பரிதாபமாக உயிரிழந்தனர். படுகாயமடைந்த தொழிலாளி பவுல்ராஜ், சேலம் அரசு மருத்துவமனையில் சிகிச்சைக்காக அனுப்பி வைக்கப்பட்டார். கணவனின் குடியை நிறுத்துவதற்காக, தாயத்து கட்டி விட்ட மனைவி ராதிகா மேரி, சடலமாக வீடு திரும்பியது உறவினர்களிடையே சோகத்தை ஏற்படுத்தியுள்ளது.