கர்ப்பமடைந்த பின் திருமணம் செய்ய மறுப்பு : காதலன் மீது நடவடிக்கை எடுக்ககோரி காதலி தர்ணா

பூந்தமல்லி அடுத்த கரையான்சாவடியை சேர்ந்தவர் லத்திபா. இவருக்கும் பம்பல் பகுதியை சேர்ந்த அரவிந்த் என்பவருக்கும் காதல் ஏற்பட்டது. திருமண ஆசையில் இருவரும் நெருங்கி பழகியதால் கடந்த 2017 ஆண்டு லத்திபா கர்ப்பம் அடைந்தார். எனினும் இருவருக்கும் திருமணம் செய்து வைக்க அரவிந்த குடும்பத்தினர் மறுத்துவிட்டதாக கூறப்படுகிறது. இதுதொடர்பாக ஏற்பட்ட பிரச்சினையில் அரவிந்த் தாக்கியதில் லத்திபாவிற்கு கருகலைப்பு ஏற்பட்டுள்ளது. இதனையடுத்து இருவரும் பிரிந்துள்ளனர். இந்நிலையில் சிறிது இடைவேளைக்கு பிறகு லத்திபாவை சந்தித்த அரவிந்த், நடந்தவற்றுக்கு மன்னிப்பு கேட்டு திருமணம் செய்துக்கொள்வதாக மீண்டும் நம்பிக்கை கொடுத்துள்ளார். இதனையடுத்து நெருக்கம் ஏற்பட லத்திபா கர்ப்பம் அடைந்தார். இதனையடுத்து மீண்டும் திருமணம் செய்ய அரவிந்த் மறுத்ததை அடுத்து லத்திபா வேதனை அடைந்துள்ளார். இதுகுறித்து பூந்தமல்லி மகளிர் காவல் நிலையத்தில் அரவிந்த் மீது லத்திபா புகார் அளித்தார். ஆனால் அரவிந்துக்கு சாதகமாக போலீசார் செயல்படுவதாக கூறி, காவல் நிலைய வாசலில் லத்திபா அமர்ந்து தர்ணா போராட்டத்தில் ஈடுபட்டார். இதனையடுத்து அரவிந்த் மீது நடவடிக்கை எடுப்பதாக போலீசார் உறுதியளித்த பின் லத்திபா தனது போராட்டத்தை கைவிட்டார்.