மின்சாரம் தாக்கி பலியான 10ஆம் வகுப்பு மாணவன் : மின்மாற்றியில் சிக்கிய செருப்பை எடுக்க சென்றபோது பரிதாபம்

தேனி மாவட்டம் ஆண்டிபட்டி அருகே காற்றாலை மின்மாற்றியில் சிக்கிய செருப்பை எடுக்க சென்ற 10ஆம் வகுப்பு மாணவன் தவமுத்து, மின்சாரம் தாக்கி பரிதாபமாக உயிரிழந்தார்.  திண்டுக்கல்லில் படித்து வரும் தவமுத்து, விடுமுறைக்காக சொந்த ஊருக்கு வந்திருந்த நிலையில், நண்பர்களுடன் காற்றாலைக்கு கீழே விளையாடி கொண்டிருந்துள்ளார். அப்போது, விளையாட்டாக நண்பர்கள் தவமுத்துவின் செருப்பை தூக்கி மின்மாற்றி கம்பி மீது வீசியதாக கூறப்படுகிறது. இந்நிலையில் தனது செருப்பை எடுக்க சென்ற போது, மின்மாற்றியில் இருந்து மின்சாரம் தாக்கியதில் அவர் படுகாயமடைந்தார். இதையடுத்து அரசு மருத்துவமனையில் அனுமதிக்கப்பட்ட அவர், சிகிச்சை பலனின்றி உயிரிழந்தார். இந்த சம்பவம் குறித்து வழக்குப்பதிவு செய்த போலீசார் விசாரணை மேற்கொண்டு வருகின்றனர்.