நெல்லை மாவட்டம் தாழையூத்து அருகே 9 வயது சிறுவன் கல்லால் அடித்து கொலை

நெல்லை மாவட்டம் தாழையூத்து அருகே 9 வயது சிறுவன் கல்லால் அடித்து கொல்லப்பட்ட சம்பவம் அதிர்ச்சியை ஏற்படுத்தியுள்ளது. குறிச்சிகுளத்தை சேர்ந்த 9 வயது சிறுவன் கொம்பையா, நண்பர்களுடன் விளையாட சென்றுள்ளான். ஆனால் வெகு நேரமாகியும் சிறுவன் வீடு திரும்பாததால், அவரது உறவினர்கள் பல்வேறு இடங்களில் தேடியுள்ளனர். எனினும் சிறுவன் கிடைக்காததால், உறவினர்கள் காவல் நிலையத்தில் புகார் அளித்தனர். இது தொடர்பாக போலீசார் விசாரணை நடத்தி வந்த நிலையில்,  குறிச்சிகுளம் கிராமத்திற்கு அருகே உள்ள நான்கு வழிச் சாலையை ஒட்டியிருக்கும் முட்புதர் நடுவில், சிறுவன் கொம்பயா சடலமாக கண்டெடுக்கப்பட்டார். சிறுவன் தலையில் கல்லால் தாக்கப்பட்ட காயம் இருந்தது. இதனையடுத்து, சிறுவனின் சடலத்தை மீட்டு, பிரேத பரிசோதனைக்கு போலீசார் அனுப்பி வைத்தனர். கொலைக்கான காரணம் குறித்து தீவிர விசாரணை நடைபெற்று வருகிறது.