பல இடங்களில் கைவரிசை காட்டிய கொள்ளை கும்பல் : திருட சென்றபோது சிக்கி கொண்ட கொள்ளையர்கள்

திருச்சி மாவட்டம் திருவெறும்பூர் அருகே உள்ள கோகுல்நகரை சேர்ந்த தர்மேந்திரன், கொல்கத்தாவில் தனியார் நிறுவனம் ஒன்றில் பணியாற்றிவருகிறார். இவர், விடுமுறைக்காக, தனது சொந்த ஊருக்கு வந்துள்ளார். வீட்டில் நிறுத்தப்பட்டிருந்த கார் கடந்த 3 ஆம் தேதி இரவு, மாயமானது. இது குறித்து தர்மேந்திரன், திருவெறும்பூர் காவல்துறையினரிடம் புகார் அளித்துள்ளார். தர்மேந்திரன் வீட்டிற்கு அருகே உள்ள தியாகராஜன் வீட்டில் அதே தினத்தன்று மர்ம நபர்கள் பீரோவில் இருந்த 7 பவுன் தங்க நகைகள், 2 எல்.இ.டி. டிவி,  ஹோம் தியேட்டர், அரை கிலோ வெள்ளி பொருட்கள் உள்ளிட்டவற்றை திருடி சென்றுள்ளனர். தியாகராஜனும் திருவெறும்பூர் காவல்நிலையத்தில் புகார் அளிக்க, போலீசார் அதிர்ச்சியடைந்தனர். இந்த நிலையில், திருவெறும்பூர் கல்லணை பிரிவு சாலையில் காரில் வந்த 3 மர்ம நபர்களை போலீசார் மடக்கி பிடித்தனர்.  கார்த்திக், தமிழ்செல்வன், ஆனந்தன் ஆகிய மூவரும் சேர்ந்து, தியாகராஜன் வீட்டில் நகை, பொருட்களை திருடிவிட்டு, அதை எடுத்துசெல்வதற்காக, தர்மேந்திரன் காரை திருடியது விசாரணையில் தெரியவந்தது.புதுக்கோட்டை , ஆதனக்கோட்டை, கள்ளக்குறிச்சி என பல இடங்களில் திருடி வந்த இந்த மூவரும்,தற்போதுகூட,திருடுவதற்காகசெல்லும்போதே போலீசாரிடம் பிடிபட்டனர்.