திருமணம் செய்து தர மறுத்ததால் பெண்ணின் தாய் கத்தியால் குத்தி கொலை

சென்னை கிண்டியில் உள்ள மசூதி காலனியை சேர்ந்த கார் ஓட்டுநர் வினோத். இவருக்கும் நரசிங்கபுரத்தை சேர்ந்த ரேவதி என்பவரின் மகளுக்கும் கடந்த ஆண்டு திருமணம் நிச்சயிக்கப்பட்டுள்ளது. வினோத்தின் நடவடிக்கை சரியில்லை என கூறி 2 மாதங்களுக்கு முன் திருமணத்தை நிறுத்தியிருக்கிறார், ரேவதி. ஆனால், மகளை திருமணம் செய்து வைக்குமாறு அவரது தாய் ரேவதியிடம், வினோத் தொடர்ந்து வற்புறுத்தி வந்ததாக கூறப்படுகிறது. அதற்கு ரேவதி தொடர்ந்து மறுப்பு தெரிவித்து வந்திருக்கிறார். 

இந்நிலையில் நேற்று இரவு வேலையை முடித்து விட்டு வீடு திரும்பிய ரேவதியை, கிண்டி அருகே தனது நண்பருடன் வழிமறித்த விநோத் தகராறு செய்ததாக கூறப்படுகிறது. அப்போதும் பெண் கொடுக்க ரேவதி மறுத்திருக்கிறார். ஆத்திரமடைந்த வினோத், மறைத்து வைத்திருந்த கத்தியால் ரேவதியை சரமாரியாக வெட்டி விட்டு நண்பர்களுடன் தப்பியோடிவிட்டார். ரத்த வெள்ளத்தில் சம்பவ இடத்திலேயே துடிதுடித்து ரேவதி உயிரிழந்தார். சம்பவ இடத்திற்கு வந்த போலீசார் ரேவதியின் உடலை கைப்பற்றி பிரேத பரிசோதனைக்காக மருத்துவமனைக்கு அனுப்பி வைத்தனர். தப்பியோடிய வினோத்தை கைது செய்த போலீசார், அவரது நண்பனை தேடி வருகின்றனர்.