மதுவாங்க ரூ 25 தராததால் வெறிச்செய​ல் - தலையில் கல்லை போட்டு கொலை

கோவை மாவட்டம் துடியலூர் அருகே பாப்ப நாயக்கன் பாளையத்தில் உள்ள முனியப்பன் கோயில் அருகே தலையில் கல்லை போட்டு கொலை செய்த நிலையில் ஆண் சடலம் கிடப்பதாக போலீசாருக்கு தகவல் கிடைத்தது. 

உடனே அங்கு விரைந்த போலீசார் சடலத்தை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். 

கொல்லப்பட்டவர், துடியலூர் பகுதியில் பொக்லைன் ஆப்ரேட்டராக பணியாற்றிய ஆனந்தகுமார் என்பது போலீசார் விசாரணையில் தெரிய வந்தது. 

கடந்த 6ஆம் தேதி பாப்பநாயக்கன் பாளையத்தில் உள்ள டாஸ்மாக் கடைக்கு சென்ற ஆனந்தகுமாருக்கும், பன்னிமடை பகுதியை சேர்ந்த அருண்குமார் என்பவருக்கும் வாக்குவாதம் ஏற்பட்டதையும் போலீசார் கண்டறிந்தனர். 

உடனே அருண்குமாரை கைது செய்து போலீசார் விசாரணை நடத்தியதில், திடுக்கிடும் தகவலை அருண்குமார் வெளியிட்டிருக்கிறார். 

தனக்கு முன்பின் அறிமுகம் இல்லாத ஆனந்தகுமாரிடம், அருண்குமார், மது வாங்க 25 ரூபாய் தருமாறு கேட்டிருக்கிறார். 

தன்னிடம் பணம் இல்லை என ஆனந்தகுமார் கூற இருவருக்கும் இடையே டாஸ்மாக் கடையிலேயே வாக்குவாதம் ஏற்பட்டதாக கூறப்படுகிறது. 

டாஸ்மாக் கடையில் இருந்து ஆனந்தகுமாரை பின்தொடர்ந்த அருண்குமார், ஆனந்தகுமாரை தாக்கி அவர் மீது கல்லை போட்டு கொன்றதாக வாக்குமூலம் அளித்துள்ளார். 

மது வாங்க 25 ரூபாய் பணம் தராத வெறியில், முன்பின் தெரியாதவரை ஒருவரை கொலை செய்துள்ள சம்பவம், அப்பகுதியில் பெரும் அதிர்ச்சியை ஏற்படுத்தியுள்ளது.