தண்டனை கைதிகளின் விடுதலை குறித்து பரிசீலிக்க எந்த சட்ட விதிகளும் மத்திய அரசிடம் இல்லை - ஆர்டிஐ பதில்

* தண்டனை கைதிகளின் விடுதலை விதிகளின் நகல், தண்டனை கழிவுகளை மாநில அரசு வழங்குவதை தடுக்கும் மத்திய அரசின் உத்தரவு நகல் உள்ளிட்ட 4 கேள்விகளை தகவல் அறியும் உரிமை சட்டத்தின் கீழ் கடந்த 2016 ஆம் ஆண்டு மத்திய தகவல் ஆணையத்திற்கு பேரறிவாளன் அனுப்பியிருந்தார். 

* இது தொடர்பாக அவர் மத்திய தகவல் ஆணையரிடம் காணொளி மூலம் தனது வாதங்களை பேரறிவாளன் வைத்தார். 

* மத்திய அரசிடம் இருந்து தகவல் ஆணையம் மூலம் உரிய பதில் கிடைக்காத நிலையில், பேரறிவாளன் உட்பட 7 பேரை முன் கூட்டியே விடுதலை செய்யும் தீர்மானத்தை நிறைவேற்றி ஆளுநருக்கு தமிழக அமைச்சரவை அனுப்பியது, 

* தீர்மானம் அனுப்பப்பட்டு 75 நாட்களுக்கு மேல் ஆன நிலையில்,  ஆளுநர் அதன்மீது எந்த இறுதி முடிவையும் இதுவரை எடுக்கவில்லை 

 * இந்நிலையில் கடந்த 5-ம் தேதி உள்துறை அமைச்சக பொது தகவல் அலுவலர் பேரறிவாளனுக்கு கடிதம் ஒன்றை அனுப்பியுள்ளார். 

* அந்த கடிதத்தில் 7 பேர் விடுதலை தொடர்பான தமிழக அரசின் பரிந்துரை கோப்பு , குடியரசு தலைவருக்கு அனுப்பப்படவில்லை என்றும்,  குற்ற விசாரணை முறைசட்ட பிரிவு 435-ன் கீழ் உள்துறை அமைச்சக அளவிலேயே முடிவெடுக்கப்பட்டது என்றும் தெரிவித்துள்ளார். 

* மேலும் தண்டனை கைதிகளின் விடுதலை குறித்து பரிசீலிக்க எந்த சட்ட விதிகளும் மத்திய அரசிடம் இல்லை என்றும் அவர் தெளிவுபடுத்தியுள்ளார். 

* இதன் மூலம் 7 பேர் விடுதலையில் மத்திய அரசின் தலையீடு இனி தொடர வாய்ப்பில்லை என்றும், அவர்களது விடுதலையை இனியும் தள்ளிப்போட முடியாது என்றும் சட்ட வல்லுநர்கள் கருத்து தெரிவித்துள்ளனர். 

* தர்மபுரி பேருந்து எரிப்பு வழக்கில் 13 ஆண்டு காலம் தண்டனை முடிந்த நிலையில் அதிமுகவினர் மூவர் விடுதலை செய்யப்பட்டதை சுட்டிக்காட்டும் சட்ட வல்லுநர்கள், அவர்களுக்கு தண்டனை வழங்கிய இந்திய தண்டனை சட்டத்தின் படியே பேரறிவாளன் உள்ளிட்ட 7 பேருக்கும் தண்டனை வழங்கப்பட்டதையும் சுட்டிக்காட்டியுள்ளனர்.

* அதிமுகவினர் மூவரும் அரசியல் சாசன சட்டத்தின் 161வது பிரிவின் படி ஆளுநரால் விடுதலை செய்யப்பட்டது போல் இவர்கள் 7 பேர்களும் விடுதலை செய்யப்படலாம் என்றும் கருத்து தெரிவித்துள்ளனர்.