திருவண்ணாமலையில் மலை உச்சியில் ஏற்றப்பட்டது, மகாதீபம் : லட்சக்கணக்கான பக்தர்கள் தரிசனம்

திருவண்ணாமலை அருணாலேஸ்வரர் கோயிலில் தீபத்திருவிழாவை யொட்டி, சாமி சன்னதியில் உள்ள அர்த்த மண்டபத்தில் காலையில் பரணி தீபம் ஏற்றப்பட்டது. மாலையில் பஞ்சமூர்த்திகள், சாமி சன்னதி முன்பு எழுந்தருளினார். அதைத்தொடர்ந்து சரியாக 6 மணிக்கு ஆண்டுக்கு ஒருமுறை மட்டுமே காட்சி தரும் அர்த்தநாரீஸ்வரர் சாமி, சன்னதியில் இருந்து ஆடியபடியே கொடிமரம் முன்பு வந்து பக்தர்களுக்கு காட்சி அளித்தார்.  அர்த்தநாரீஸ்வரர் காட்சி தந்ததும் சரியாக மாலை 6 மணிக்கு சாமி சன்னதி முன்பு அகண்டதீபம் ஏற்றப்பட்டது.அதே நேரத்தில் 2 ஆயிரத்து 668 அடி உயர மலை உச்சியில் மகாதீபம் ஏற்றப்பட்டது.  அப்போது அங்கு கூடியிருந்த   லட்சக்கணக்கான பக்தர்கள் அண்ணாமலையாருக்கு அரோகரா என்ற பக்தி கோஷத்துடன் சாமி தரிசனம் செய்தனர்.

மதுரை மாவட்டம் திருப்பரங்குன்றத்தில் உள்ள சுப்பிரமணிய சுவாமி கோவிலில், திருக்கார்த்திகை விழா நடைபெற்றது. முருக பெருமானின் முதல்படை வீடான திருப்பரங்குன்றத்தில், கார்த்திகையையொட்டி, மலை மீது மகாதீபம் ஏற்றப்பட்டது. அங்குள்ள உச்சிப் பிள்ளையார் கோவிலின் மீது, பிரம்மாண்ட கொப்பரையில் 300 கிலோ நெய், 100 மீட்டர் திரி, 5 கிலோ கற்பூரத்தில் தீபம் ஏற்றப்பட்டது. அப்போது, 'அரோகரா' கோஷத்துடன், பக்தி பரவசத்துடன் பக்தர்கள் வழிபட்டனர்.