மதுரை இளைய ஆதீன பொறுப்புக்கு நித்யானந்தா, எந்தக் காலமும் வரமுடியாது - மதுரை ஆதீனத்தின் வழக்கறிஞர் ஜி.ஜெயச்சந்திரன்
மதுரை இளைய ஆதீன பொறுப்புக்கு நித்யானந்தா, எந்தக் காலமும் வரமுடியாது என்றும், ஆதீனத்திற்குள் நுழைய முயற்சித்தால் சட்டப்படி கடும் நடவடிக்கை எடுக்கப்படும் என்றும், மதுரை ஆதீனத்தின் வழக்கறிஞர் தெரிவித்துள்ளார்.
* மதுரை ஆதீனத்தின் வழக்கறிஞர் ஜி.ஜெயச்சந்திரன் வெளியிட்டுள்ள அறிக்கையில், கடந்த 2012ம் ஆண்டு ஏப்ரல் 23ஆம் தேதி நித்யானந்தா இளைய ஆதீனமாக நியமிக்கப்பட்ட நிலையில், அதே ஆண்டு அக்டோபர் 19ஆம் தேதி அந்த நியமனம் ரத்து செய்யப்பட்டதாகக் கூறப்பட்டுள்ளது.
* இது செல்லாது என நித்யானந்தா, மதுரை மாவட்ட சார்பு நீதிமன்றத்தில் தொடர்ந்த வழக்கு விசாரணையில் உள்ளதாகவும்,
அதேநேரம், இந்துசமய அறநிலையத்துறை, நித்யானந்தா நியமனத்தை எதிர்த்து தொடர்ந்த வழக்கும், அவருக்கு எதிராக பெற்ற தடை உத்தரவும் நிலுவையில் இருப்பதாகக் குறிப்பிட்டுள்ளார்.
* இந்நிலையில், உயர்நீதிமன்றம் பிறப்பித்த உத்தரவில், நித்யானந்தா மதுரை ஆதீனத்திற்குள் நுழையவோ, 293வது ஆதீனமாக தொடரவோ சட்டப்படி முகாந்திரத்தை ஏற்படுத்தவில்லை என அறிக்கையில் தெரிவித்துள்ளார்.
* நித்யானந்தா மீதான எந்தத் தடையையும் உயர்நீதிமன்றம் நீக்கவில்லை என்றும், மதுரை ஆதீன நிர்வாகத்திற்கு தொடர்பில்லாத சிலரால் கீழமை நீதிமன்றத்தில் தொடர்ந்த வழக்கில் உயர்நீதிமன்றம் மனுதாரருக்கு முகாந்திரம் இல்லை எனக்கூறி முடித்து வைத்துள்ளதாகக் கூறியுள்ளார்.
* மதுரை ஆதீனம் நித்யானந்தாவை ஒருபோதும் அதன் நிர்வாகத்தில் தலையிட அனுமதிக்காது என்றும்,அவர் அந்தப் பொறுப்புக்கு எந்தக் காலமும் வரமுடியாது எனவும் அவர் தெரிவித்துள்ளார்.
* நித்யானந்தா, மதுரை ஆதீனத்திற்குள் நுழைய முயற்சித்தால் சட்டப்படி கடும் நடவடிக்கை எடுக்கப்படும் எனவும், வழக்கறிஞர் ஜி.ஜெயச்சந்திரன் கூறியுள்ளார்.
Next Story
