ரயில் படிக்கட்டில் பயணம் செய்த 4 பேர் பலி

சென்னை கடற்கரை முதல் திருமால்பூர் வரை செல்லும் மின்சார ரயிலில் இந்த விபத்து நிகழ்ந்துள்ளது. காலை 8 மணியளவில், கடற்கரை -  தாம்பரம் இடையிலான ரயில் வழித்தடத்தில், மின் இணைப்பு துண்டிக்கப்பட்டதால், சுமார் ஒரு மணி நேரத்திற்கும் மேலாக போக்குவரத்து பாதிக்கப்பட்டது. இதனால், ரயில்களில் பயணிகளின் கூட்டம் நிரம்பி வழிந்தது. சுமார் 9 மணியளவில், பெரும்பாலான மின்சார ரயில்கள் விரைவு ரயில் தடத்தில் இயக்கப்பட்டன. கடற்கரையில் இருந்து திருமால்பூர் சென்று கொண்டிருந்த ரயில் ஒன்று, பரங்கிமலை வந்த போது, படியில் தொங்கி பயணம் செய்து கொண்டிருந்த பயணிகள் மீது, ரயில் நிலையத்தில் இருந்த தடுப்புச் சுவர் மோதியது. இதனால், 4 பேர் சம்பவ இடத்திலேயே உயிரிழந்தனர். படுகாயமடைந்தவர்கள் மருத்துவமனையில் அனுமதிக்கப்பட்டுள்ளனர். பரங்கிமலை ரயில் நிலையத்தில் நேற்று இரவிலும், இதேபோல 2 பயணிகள் உயிரிழந்த நிலையில், தற்போது மீண்டும் 4 பேர் பலியாகியுள்ளனர்.