சூடுபிடிக்கும் அரசியல் களம்..!ராகுல்காந்தி இன்று தமிழகம் வருகை | Congress

திருநெல்வேலியிலும், கோவையிலும் ராகுல்காந்தி இன்று பிரசாரம் மேற்கொள்கிறார். இதற்காக பாளையங்கோட்டை ஒருங்கிணைந்த நீதிமன்ற வளாகத்திற்கு அருகே தனியார் பள்ளி மைதானத்தில் பிரமாண்ட பொதுக்கூட்ட மேடை அமைக்கப்பட்டுள்ளது. தூத்துக்குடி விமான நிலையம் வரும் ராகுல்காந்தி ஹெலிகாப்டர் மூலம் பாளையங்கோட்டை தூய யோவான் மேல்நிலைப் பள்ளி திடலில் அமைக்கப்பட்டுள்ள ஹெலிபேடில் இறங்குகிறார். அங்கிருந்து ரோடு ஷோவிலும் பங்கேற்கிறார். அவர் வருகையை முன்னிட்டு, திருநெல்வேலியில் ட்ரோன்கள் பறக்கத் தடை விதிக்கப்பட்டுள்ளது.

பிரச்சாரத்தில் திருநெல்வேலி, தூத்துக்குடி, கன்னியாகுமரி, விருதுநகர் தொகுதி வேட்பாளர்களை ஆதரித்து வாக்கு சேகரிக்கிறார்.

அதை தொடர்ந்து கோவை செல்லும் ராகுல்காந்தி, முதல்வர் மு.க.ஸ்டாலினுடன் இணைந்து பிரச்சாரம் மேற்கொள்கிறார். இதற்காக, கோவை செட்டிபாளையம் எல் அன்ட் டி பைபாஸ் சாலை அருகே நடைபெறும் பிரம்மாண்ட பொதுக்கூட்டத்தில் இருவரும் இணைந்து இந்தியா கூட்டணி வேட்பாளர்களை ஆதரித்து பேசுகின்றனர். ராகுல்காந்தியின் வருகையை முன்னிட்டு கோவை மற்றும் நெல்லையில் பலத்த போலீஸ் பாதுகாப்பு போடப்பட்டுள்ளது.