ஆந்திர முதல்வராக ஜெகன்மோகன் ரெட்டி இன்று பதவியேற்பு : பதவியேற்பு விழாவில் ஸ்டாலின் பங்கேற்கிறார்

மக்களவை தேர்தலுடன்,  ஆந்திராவில் சட்டப்பேரவை தேர்தல் நடைபெற்றது. அதில், மொத்தம் உள்ள, 175 தொகுதிகளில், ஜெகன் மோகன் ரெட்டியின், ஒய்.எஸ்.ஆர் காங்கிரஸ் கட்சி 151 இடங்களை கைப்பற்றி அமோக வெற்றி பெற்றது. இதனை தொடர்ந்து ஜெகன் மோகன் ரெட்டி இன்று மதியம் ஆந்திர முதலமைச்சராக பதவியேற்க உள்ளார். விஜயவாடாவில் உள்ள இந்திரா காந்தி நகராட்சி மைதானத்தில் பதவியேற்பு விழா நடைபெறுகிறது. விழாவில் பங்கேற்க ஆந்திரா முழுவதிலும் இருந்து ஆயிரக்கணக்கான தொண்டர்கள் குவிந்து வருவதால், பலத்த பாதுகாப்பு ஏற்பாடுகள் செய்யப்பட்டுள்ளது. ஜெகன்மோகன் ரெட்டி பதவியேற்பு விழாவில் திமுக தலைவர் ஸ்டாலின் பங்கேற்க உள்ளதாக கூறப்படும் நிலையில், ஆந்திர முன்னாள் முதலமைச்சர் சந்திரபாபு நாயுடு பங்கேற்க மாட்டார் என தகவல் வெளியாகியுள்ளது. இதற்கிடையே, முதல்வர் பதவியேற்றதும் இன்று மாலை டெல்லி செல்லும் ஜெகன்மோகன் ரெட்டி,  பிரதமர் மோடியின் பதவியேற்பு விழாவில் பங்கேற்பார் என கூறப்படுகிறது.