திமுக தலைவர் கருணாநிதி இறப்பு : தலைவர்கள்,முக்கிய பிரமுகர்கள் இரங்கல்

சென்னை - ராஜாஜி அரங்கில் வைக்கப்பட்டிருந்த கருணாநிதியின் உடலுக்கு, தேசியவாத காங்கிரஸ் தலைவர் சரத்பவார்,  காங்கிரஸ் மூத்த தலைவர்கள் குலாம் நபி ஆசாத், வீரப்ப மொய்லி, கேரள ஆளுநர் சதாசிவம், கேரள முதலமைச்சர் பினராயி விஜயன்,தெலுங்கானா முதலமைச்சர் சந்திரசேகர ராவ், கர்நாடக முதலமைச்சர் குமாரசாமி, அம்மாநில முன்னாள் முதலமைச்சர் சித்தராமய்யா, டெல்லி முதலமைச்சர் அரவிந்த் கெஜ்ரிவால், உத்தரபிரதேச முன்னாள் முதலமைச்சர் அகிலேஷ் யாதவ், மார்க்சிஸ்ட் கம்யூனிஸ்ட் கட்சியின் மூத்த தலைவர்கள் பிரகாஷ் காரத், சீதாராம் யெச்சூரி , ஜம்மு - காஷ்மீர் முன்னாள் முதலமைச்சர் ஃபரூக் அப்துல்லா, மற்றும் பீஹார் முன்னாள் துணை முதலமைச்சர் தேஜஸ்வி, முன்னாள் மத்திய அமைச்சர் பிரபுல் படேல், உள்ளிட்டோரும் மலர் வளையம் வைத்து இறுதி அஞ்சலி செலுத்தினர்.

சென்னை - ராஜாஜி அரங்கில் வைக்கப்பட்டிருந்த கருணாநிதி உடலுக்கு, தமிழக முதலமைச்சர் எடப்பாடி பழனிச்சாமி நேரில் அஞ்சலி செலுத்தினார். 

துணை முதலமைச்சர் ஓ. பன்னீர் செல்வம், மக்களவை துணை சபாநாயகர் தம்பிதுரை, தமிழக சட்டப்பேரவை தலைவர் தனபால் மற்றும் அமைச்சர்கள் திண்டுக்கல் சீனிவாசன், கே.ஏ. செங்கோட்டையன், டி. ஜெயக்குமார், தங்கமணி மற்றும் எஸ்.பி. வேலுமணி உள்ளிட்டோரும் கருணாநிதி உடலுக்கு மலர் வளையம் வைத்து, அஞ்சலி செலுத்தினர். மறைந்த திமுக தலைவர் கருணாநிதியின் மறைவுக்கு,  முதலமைச்சர் எடப்பாடி பழனிச்சாமி இரங்கல் தெரிவித்தார்.