8 சிறுவர்களின் கழுத்தை கடித்து இழுத்து சென்று கொடூரமாக கொன்ற ஓநாய்கள் - பீதியில் மக்கள்

உத்தரபிரதேச மாநிலம் பராச் பகுதியில் தொடர்ச்சியாக இரவு நேரங்களில் ஓநாய்கள் வீட்டுக்குள் புகுந்து சிறார்களை கடித்து இழுத்துச் சென்ற சம்பவங்கள் மக்களிடையே பெரும் அச்சத்தை ஏற்படுத்தியது. சிறுவர்களை கழுத்தை கடித்து ஓநாய்கள் தூக்கிக்கொண்டு ஓடிய வீடியோ காட்சிகள் மக்களை பயத்தில் பதற செய்தது. 45 நாட்களில் ஒரு பெண் மற்றும் 8 சிறார்களை ஓநாய் கூட்டம் கொடூரமாக கொன்றது. மக்கள் வீடுகளுக்குள்ளே முடங்க இரவு முழுவதும் ஊரில் கண்காணிப்பு அதிகரிக்கப்பட்டது. வனத்துறையும் ஓநாய்களை பிடிக்கும் பணியில் தீவிரம் காட்டியது. ஆபரேஷன் பேடியா என்று ஓநாய்களை பிடிக்க ட்ரோன்கள், அகச்சிவப்பு கேமராக்கள் மற்றும் தெர்மல் இமேஜிங் கேமராக்கள் எல்லாம் கண்காணிப்பில் இறக்கப்பட்டது. ஓநாய்கள் நடமாட்டம் குறித்து மக்களுக்கு தகவல் தெரிவிக்கப்பட்டு வந்தது. ஓநாய்கள் செல்லும் பாதையை கணித்து வைக்கப்பட்ட கூண்டுகளில் 4 ஓநாய்கள் சிக்கியுள்ளன. அவை வேறு இடத்திற்கு கொண்டு செல்லப்பட்ட நிலையில், மீதம் இருக்கும் இரண்டு ஓநாய்களையும் பிடிக்கும் பணிகள் தீவிரமாக நடைபெற்று வருகிறது.