அடுத்த 5 நாட்களுக்கு பின்னியெடுக்க போகும் மழை..10 மாவட்டங்களில் மஞ்சள் எச்சரிக்கை

கேரளாவில் 10 மாவட்டங்களில் இன்று மஞ்சள் எச்சரிக்கை விடுக்கப்பட்டுள்ள நிலையில், மீன்பிடிக்க தடை விதிக்கப்பட்டுள்ளது.அரபிக்கடல் மற்றும் வங்கக்கடலில் உருவாகியுள்ள குறைந்த காற்றழுத்த தாழ்வுநிலை காரணமாக கேரளாவில் மழை தொடரும் என வானிலை ஆய்வு மையம் தெரிவித்துள்ளது. கேரளாவில் அடுத்த 5 நாட்களுக்கு மிதமான மழையும், இன்றுமுதல், வரும் 1-ம் தேதி வரை ஓரிரு இடங்களில் கனமழை பெய்ய வாய்ப்புள்ளதாகவும் தெரிவிக்கப்பட்டுள்ளது. ஆலப்புழா, இடுக்கி, எர்ணாகுளம், திருச்சூர், பாலக்காடு, மலப்புரம், கோழிக்கோடு, வயநாடு, கண்ணூர், காசர்கோடு ஆகிய 10 மாவட்டங்களில் இன்று மஞ்சள் எச்சரிக்கை விடுக்கப்பட்டுள்ளது. கேரளா, கர்நாடகா மற்றும் லட்சத்தீவு கடற்கரையில் மீன்பிடிக்க தடை நீடிக்கிறது. திருவனந்தபுரத்தில் மலைப்பகுதிகள், கடலோரப் பகுதிகளுக்கு அத்தியாவசிய சேவைகள் தவிர, குவாரிகள் மற்றும் சுரங்க நடவடிக்கைகளுக்கு தடை விதிக்கப்பட்டுள்ளது.