நள்ளிரவில் 15 பேர் கொண்ட கும்பல் நடத்திய பயங்கரம்... பரபரப்பு சிசிடிவி காட்சி

புதுச்சேரியில்... 15க்கும் மேற்பட்ட கும்பல் மரக்கடைக்குள் புகுந்து கடையை சூறையாடிச் செல்லும் சிசிடிவி வெளியாகி பரவி வருகிறது.

புதுச்சேரி, நெல்லித் தோப்பு பகுதியை சேர்ந்தவர் முருகன். இவர், ஸ்ரீதர் என்பவருக்கு சொந்தமான நிலத்தில், கடந்த 40 வருடங்களாக மரக்கடை நடத்தி வருவதாக கூறப்படுகிறது. இந்நிலையில், தான் கடை நடத்தி வரும் இடத்தை ஸ்ரீதர் தனக்கு எழுதி கொடுத்ததாக கூறி முருகனும், அந்த நிலத்தை முருகன் ஆக்கிரமிப்பு செய்துவிட்டதாக ஸ்ரீதரும் மோதி வந்துள்ளனர். இது குறித்தான வழக்கு நீதிமன்றத்தில் நிலுவையிலும் உள்ளது. இந்நிலையில், முருகனின் மரக்கடைக்குள் நள்ளிரவில் புகுந்த 15க்கும் மேற்பட்ட கும்பல், முருகன் மற்றும் அவரது குடும்பத்தினரை தாக்கி கடையை சூறையாடிய நிலையில், கொலை மிரட்டலும் விடுத்துச் சென்றிருக்கின்றனர். சம்பவம் குறித்தான சிசிடிவி பரவி வரும் நிலையில், சிசிடிவி காட்சி ஆதாரத்துடன் தலைமறைவாக உள்ள கும்பலை போலீசார் வலை வீசி தேடி வருகின்றனர்.