`பாரத் பந்த்'.. நாடு தழுவிய முழு அடைப்பு போராட்டம்.. விவசாய அமைப்புகள் அழைப்பு

பஞ்சாப் மாநில விவசாயிகள், டெல்லியை நோக்கி போராட்டத்தை முன்னெடுத்துள்ள நிலையில், அவர்களின் கோரிக்கையை வலியுறுத்தி இன்று நாடு தழுவிய முழு அடைப்பு போராட்டம் நடைபெறவுள்ளது.விவசாய உற்பத்தி பொருட்களுக்கு குறைந்தபட்ச ஆதரவு விலையை உறுதி செய்வது உள்ளிட்ட கோரிக்கைகளை வலியுறுத்தி பஞ்சாப் மாநில விவசாயிகள், டெல்லி நோக்கி பேரணி செல்ல புறப்பட்டனர். அவர்களை ஹரியாணா எல்லையில் அம்மாநில போலீசார் தடுத்து நிறுத்தி வைத்துள்ளனர். தடுப்புகளை மீறி செல்ல முயன்ற விவசாயிகள் மீது போலீசார் கண்ணீர் புகை குண்டுகள் வீசியதால் எல்லையில் பதற்றம் நிலவுகிறது. இந்நிலையில் விவசாயிகளின் போராட்டத்துக்கு ஆதரவு தெரிவித்து, பல்வேறு விவசாய அமைப்புகள் இன்று நாடு தழுவிய முழு அடைப்பு போராட்டத்துக்கு அழைப்பு விடுத்துள்ளன. சம்யுக்த கிசான் மோர்ச்சா என்ற விவசாய அமைப்பும், பல்வேறு தொழிற்சங்கங்களும் முழு அடைப்புக்கு அழைப்பு விடுத்துள்ளன. காலை 6 மணி முதல் மாலை 4 மணி வரை இந்தப் போராட்டம் நடைபெறவுள்ளது. குறிப்பாக, பகல் 12 மணியில் இருந்து மாலை 4 மணி வரை, முக்கிய சாலைகளை மறித்து விவசாயிகள் போராட்டத்தில் ஈடுபடவுள்ளனர்.