மைதானத்தில் விளையாட சென்ற சிறுவர்களை மரத்தில் கட்டி வைத்து கொடுமை - 6 பேர் கைது

பெங்களூரு தேவ சந்திரா என்ற பகுதியில் உள்ள பூங்கா ஒன்றில் பத்துக்கும் மேற்பட்ட சிறுவர்கள் விளையாடிக் கொண்டிருந்தனர். அப்போது அங்கிருந்த சில இளைஞர்கள், விளையாடிக் கொண்டிருந்த சிறுவர்களை மிரட்டியதுடன், அவர்களை மரத்தில் கட்டி வைத்து சிகரெட் மற்றும் பீடியை புகைக்கும் படி கட்டாயப் படுத்தியதாக கூறப்படுகிறது. இதற்கு மறுத்த சிறுவர்களை பிரம்புகளால் தாக்கியுள்ளனர். இதை அங்கிருந்த ஒருவர் தனது செல்போனில் படம் பிடித்துள்ளார். இந்த காட்சிகள் சமூக வலைத்தளங்களில் வெளியாகி பரபரப்பை ஏற்படுத்தியது. இதுகுறித்து பாதிக்கப்பட்ட சிறுவர்களின் பெற்றோர் போலீசில் புகார் அளித்தனர். இது தொடர்பாக வழக்கு பதிவு செய்த போலீசார், 4 சிறுவர்கள் உட்பட 6 பேரை கைது செய்து விசாரணை செய்து வருகின்றனர்.