எல்லையில் படையை குவிக்கும் சீனா - லடாக் எல்லையில் நடப்பது என்ன...?

கிழக்கு லடாக்கில் ராணுவப் படைகளை சீனா குவித்து வருவதாக கூறியிருக்கும் ராணுவ தளபதி நரவானே, இந்திய ராணுவம் எல்லையில் கண்காணிப்பை அதிகரித்திருப்பதாகவும், எந்த ஒரு சவாலையும் சமாளிக்க தயாராக இருப்பதாகவும் தெரிவித்துள்ளார். இந்தியாவும், சீனாவும் 3 ஆயிரத்து 488 கிலோ மீட்டர் தொலைவு எல்லையை பகிர்ந்துள்ளன. வடகிழக்கு மாநிலமான அருணாச்சல பிரதேசத்திற்கு சீனா உரிமை கோரும் நிலையில், அந்நாட்டு ராணுவம் சிக்கிம், லடாக் எல்லையில் அவ்வப்போது இந்திய பகுதிக்குள் அத்துமீறி நுழைகிறது. அவர்களை இந்திய ராணுவம் தடுத்து நிறுத்தி திரும்பிச்செல்ல செய்கிறது. இவ்வாறு கடந்த 2020 ஆம் ஆண்டு மே மாதம் கிழக்கு லடாக்கில் கல்வான் பள்ளத்தாக்கு பகுதியில் சீன ராணுவம் அத்துமீறிய போது மோதல் வெடித்தது. அப்போது நேரிட்ட சண்டையில் இந்திய தரப்பில் 20 ராணுவ வீரர்கள் வீர மரணமடைந்தனர். சீன தரப்பில் 40-க்கும் அதிகமான வீரர்கள் உயிரிழந்ததாக தகவல்கள் வெளியாகின. கிழக்கு லடாக்கில் நீண்ட நாட்களாக பதற்றம் நீடித்த நிலையில், இருதரப்பு பேச்சுவார்த்தையை அடுத்து கடந்த பிப்ரவரியில் படைகள் வாபஸ் பெறப்பட்டன.இந்தியா-சீனா இடையிலான எல்லை பல இடங்களில் வரையறை செய்யப்படவில்லை. இதுகுறித்த பேச்சுவார்த்தை இரதரப்பு இடையே நீண்டுக் கொண்டே செல்கிறது.இதற்கிடையே எல்லையில் ராணுவ கட்டமைப்புகளை வலுப்படுத்தும் பணிகளை தொடர்ந்து செய்துவரும் சீனா, கடுமையான வானிலை நிலவும் பகுதியில் ராணுவ வீரர்களை தொடர்ந்து குவித்து வருகிறது. கடந்த ஆகஸ்ட் மாதம் 30 ஆம் தேதி உத்தரகாண்ட் மாநிலம் பரஹோடி பகுதிக்குள் சுமார் 100 சீன ராணுவ வீரர்கள் நுழைந்ததாகவும் தகவல்கள் வெளியாகியுள்ளன. இந்தியாவும், அங்கு ராணுவ கட்டமைப்புகளை வலுப்படுத்தி வருகிறது. இரு நாடுகளும் 50 ஆயிரம் முதல் 60 ஆயிரம் வீரர்களை அங்கு குவித்திருப்பதாக கூறப்படுகிறது.இந்நிலையில் டெல்லியில் பி.எச்.டி. தொழில்வர்த்தக சபையில் பேசிய இந்திய ராணுவ தளபதி நரவானே, இருதரப்பு எல்லை குறித்த ஒப்பந்தம் கையெழுத்தாகும் வரையில், எல்லை பிரச்சினை தொடரும் எனக் கூறியுள்ளார்.இந்திய ராணுவம் எல்லையில் அபிவிருத்தி பணிகளை மேற்கொண்டிருப்பதுடன், கண்காணிப்பையும் அதிகரித்துள்ளதாகவும், எந்தஒரு சவாலையும் சமாளிக்க இந்திய ராணுவம் தயாராக இருப்பதாகவும் நரவானே கூறியிருக்கிறார். இதனையடுத்து லடாக் சென்ற நரவானே, கிழக்கு லடாக்கில் இந்திய படைகளின் தயார் நிலையை ஆய்வு செய்தார். அங்கு பாதுகாப்பு பணியை மேற்கொள்ளும் 14-வது படைப்பிரிவு அலுவலகத்தில், அவரிடம் ஏற்பாடுகள் குறித்து விரிவாக விளக்கப்பட்டுள்ளது.