75வது சுதந்திர தின விழா கொண்டாட்டம் - 8வது முறையாக தேசியக்கொடி ஏற்றிய பிரதமர்

75வது சுதந்திர தினமான இன்று செங்கோட்டையில் 8வது முறையாக மூவர்ண தேசிய கொடியை ஏற்றி பிரதமர் மோடி மரியாதை செலுத்தினார். சுதந்திர தின விழாவில் பங்கேற்பதற்காக விழா நடைபெறும் செங்கோட்டைக்கு வந்த பிரதமரை பாதுகாப்புத் துறை அமைச்சர் ராஜ்நாத் சிங், இணை அமைச்சர் அஜய் பட் மற்றும் பாதுகாப்பு துறை செயலாளர் அஜய்குமார் ஆகியோர் வரவேற்றனர். பின்னர் முப்படைகளின் அணிவகுப்பு மரியாதையை ஏற்ற பிரதமர் மோடி, தேசிய கீதம் இசைக்க செங்கோட்டையில் மூவர்ண தேசியக் கொடியை ஏற்றி வைத்து மரியாதை செலுத்தினார். அப்போது விமானப் படையின் எம்ஐ-17 1வி ஹெலிகாப்டர்கள் வானில் இருந்தபடி மலர் தூவியது. பின்னர் நாட்டு மக்களிடம் உரையாற்றிய பிரதமர், சுதந்திர போராட்ட தியாகிகளை நினைவு கூர்ந்தார். இந்த விழாவில் மத்திய அமைச்சர்கள், முப்படை தளபதிகள், பல்வேறு நாடுகளின் தூதர்கள் உள்ளிட்டோர்  பங்கேற்றனர். கொரோனா பரவல் காரணமாக தேசியக்கொடி ஏற்றும் நிகழ்வை பார்க்க பொதுமக்களுக்கு அனுமதி மறுக்கப்பட்டது.