ஒடிசாவில் கரை கடந்த ஃபானி புயல் : கொட்டி தீர்த்த கனமழை - வேரோடு சாய்ந்த மரங்கள்

தென்கிழக்கு வங்கக் கடலில் உருவான ஃபானி புயல் தமிழகத்தின் வடகடலோர பகுதியில் கரையைக் கடக்கும் என எதிர்பார்க்கப்பட்டது. ஆனால் அந்த புயல் திசைமாறி ஒடிசா மாநிலம் கோபால்பூர் - சந்த்பாலிக்கு இடையே இன்று காலை 8 மணி முதல் கரையை கடக்க தொடங்கியது. அப்போது பூரி, கோபால்பூர் உள்ளிட்ட இடங்களில் மணிக்கு சுமார் 140 முதல் 180 கிலோ மீட்டர் வேகத்தில் பலத்த  காற்று வீசியது. இதில் மரங்கள், மின்கம்பங்கள் வேரோடு சாய்ந்தன. வீட்டின் கூரைகள் பறந்தன. ஏராளமான வீடுகள் பலத்த சேதம் அடைந்தன. பலத்த காற்றுடன் தொடர்ந்து மழை பெய்து வருவதால்  பொதுமக்கள் பீதி அடைந்துள்ளன. முன்னெச்சரிக்கை நடவடிக்கையாக சுமார் 11 லட்சம் பேர் நிவாரண முகாம்களில் தங்கவைக்கப்பட்டுள்ளனர். இதனிடையே மேற்கு வங்கம், ஆந்திர பிரதேசம் உள்ளிட்ட மாநிலங்களின் சில பகுதிகளிலும் பலத்த காற்றும், மழையும் கொட்டி தீர்த்தது. வலுவிழந்த ஃபானி புயல் மேற்கு வங்கம் மற்றும் வங்க தேசத்தை நோக்கி நகரும் என அறிவிக்கப்பட்டுள்ளது. இதனால் அடுத்து வரும் நாட்களில் அங்கு காற்றுடன் கூடிய கன மழை பெய்யும் என எதிர்பார்க்கப்படுகிறது.