சிகிச்சைக்கு வந்த பெண்ணை எட்டி உதைத்த பெண் காவலர் : இணையதளத்தில் வேகமாக பரவும் தாக்குதல் காட்சி

சிகிச்சைக்கு வந்த பெண்ணை, பெண் காவலர் எட்டி உதைத்த வீடியோ காட்சி இணையதளத்தில் வேகமாக பரவி வருகிறது. புதுச்சேரி பாகூரை சேர்ந்த வெங்கடேச பெருமாள் என்பவரின் மனைவி சாந்தி, கடலூர் புதுநகர் காவல் நிலையத்தில் காவலராக பணியாற்றி வருகிறார். கணவன்-மனைவி இருவருக்கிடையே கருத்து வேறுபாடு காரணமாக இருவரும் பிரிந்து வாழும் நிலையில், இரு குடும்பத்திற்கும் இடையே மோதல் ஏற்பட்டுள்ளது. இதில் வெங்கடேச பெருமாளின் உறவினர் புவனேஸ்வரி காயமடைந்து, பாகூர் ஆரம்ப சுகாதார நிலையத்தில் அனுமதிக்கப்பட்டுள்ளனர். தகவல் அறிந்த அங்கு வந்த சாந்தி, புவனேஸ்வரியை காலால் எட்டி உதைத்ததுடன் தகாத வார்த்தைகளால் திட்டியதாகவும் கூறப்படுகிறது. இந்த வீடியோ தற்போது சமூக வலை தளங்களில் வேகமாக பரவி வரும் நிலையில், இரு தரப்பினரும் மீது வழக்குப் பதிவு  செய்து, பாகூர் போலீசார் விசாரணை மேற்கொண்டு வருகின்றனர்.