கோவையில் கழுத்தை அறுத்த கயிறு... பைக்கில் சென்றவரை துடிக்க வைத்த சம்பவத்தில் சிக்கிய மூவர்

கோவை உக்கடம் ஆத்துப்பாலம் மேம்பாலத்தில், கடந்த 7ஆம் தேதி, கார்த்திக் என்பவர் இரு சக்கர வாகனத்தில் சென்ற போது பாலத்தில் பறந்து வந்த பட்டத்தின் நூல் அவரின் கழுத்தில் சுற்றிக் கொண்டது. நிலை தடுமாறிய அவர், உடனடியாக வாகனத்தை நிறுத்தி பட்ட நூலை எடுக்க முற்பட்டபோது, கைகள் மற்றும் கழுத்தில் ரத்த காயம் ஏற்பட்டது. சிகிச்சை பெற்றுக் கொண்ட கார்த்திக் மாநகர காவல் ஆணையரிடம் இது தொடர்பாக புகார் அளித்தார். இது தொடர்பாக விசாரணை மேற்கொண்ட காவல்துறையினர், கருப்புக்கடை பகுதியை சேர்ந்த ரியாஸ், அசிம் பைசல் மற்றும் அப்துல் ஹமீது ஆகிய 3 பேரை கைது செய்தனர். அவர்கள் மீது தெரிந்தே மற்றவர்களுக்கு காயம் ஏற்படுத்தும் வகையில் செயல்பட்டது உள்ளிட்ட இரண்டு பிரிவுகளின் கீழ், வழக்குப்பதிவு செய்தனர். கடுமையான எச்சரிக்கைக்கு பிறகு கைது செய்யப்பட்ட மூவரும் காவல் நிலையப் பிணையில் விடுவிக்கப்பட்டனர்.