பிறந்தநாளே டான்ஸர் ரமேஷ் உயிரை பறித்தது.. வெளியான அதிர்ச்சி காரணம்

சமூகவலைதளம் மூலம் பிரபலமான டான்ஸர் ரமேஷ், தனது பிறந்தநாளின் போது, வீட்டின் 10வது மாடியில் இருந்து கீழே விழுந்த சம்பவம், அதிர்ச்சியை ஏற்படுத்தியுள்ளது.

இன்ஸ்டாகிராம் ரீல்ஸ் மூலமாக நடனமாடிய வீடியோவை வெளியிட்டு, சமூக வலைதளங்களில் பிரபலமானவர் டான்ஸர் ரமேஷ். தனியார் தொலைக்காட்சி நடன நிகழ்ச்சியில் பங்கேற்று, தனது தனித் திறமையை வெளிப்படுத்திய அவர், அஜித்தின் துணிவு மற்றும் ரஜினிகாந்தின் ஜெயிலர் படங்களில் சிறு வேடங்களில் நடித்துள்ளார். டான்சர் ரமேஷீக்கு 2 மனைவிகள் உள்ளனர்.

கே.பி. பார்க் பகுதியில் உள்ள 2வது மனைவியான இன்பவள்ளி வீட்டில் தங்கியிருந்த ரமேஷ், ஜனவரி 27ம் தேதி தனது பிறந்த நாளை கொண்டாடியுள்ளார். அப்போது, பிறந்தநாள் பார்ட்டி வைக்க, தனது மனைவி இன்பவள்ளியிடம் பணம் கேட்டதாக கூறப்படுகிறது.

பணம் தர மறுக்கவே, விரக்தியடைந்த அவர், வீட்டின் 10வது மாடியில் இருந்து குதித்து தற்கொலை செய்து கொண்டதாக உறவினர்கள் தரப்பில் கூறப்படுகிறது.

சம்பவ இடத்திற்கு வந்த போலீசார், உடலை மீட்டு பிரேத பரிசோதனைக்கு அனுப்பி வைத்தனர்.

எனினும் இதனை சந்தேக மரண வழக்காக போலீசார் வழக்குப்பதிவு செய்து விசாரணை நடத்தி வருகின்றனர்.