கனிமவள கொள்ளையை தடுத்த வி.ஏ.ஓ.-வை டிராக்டர் ஏற்றி கொல்ல முயற்சி.. தருமபுரியில் அதிர்ச்சி

தர்மபுரி மாவட்டம் பாப்பிரெட்டி அருகே, கனிமவளம் கொள்ளையடிப்பதை தடுக்கச் சென்ற கிராம நிர்வாக அலுவலரை, டிராக்டர் ஏற்றிக் கொல்ல முயற்சித்த சம்பவம் அதிர்ச்சியை ஏற்படுத்தியுள்ளது.

பாப்பிரெட்டிப்பட்டி வட்டம் மெணசி கிராம நிர்வாக அலுவலராக இருப்பவர் இளங்கோ. மெணசி பகுதியில் கனிமவளக் கொள்ளை திருடப்படுவதாக வந்த தகவலை அடுத்து, அங்கு இளங்கோ விரைந்து சென்றுள்ளார். அப்போது குண்டல் மடுவு காளியம்மன் கோவில் அருகே, உளி கற்களை ஏற்றிக்கொண்டு டிராக்டர் ஒன்று அதிவேகமாக சென்றது. அந்த டிராக்டரை விஏஓ இளங்கோ தடுக்க முயற்சித்த போது, அவரை ஏற்றிக் கொலை செய்யும் நோக்கில் டிராக்டர் நிற்காமல் சென்றது. இதில் இளங்கோ அதிர்ஷ்டவசமாக உயிர் தப்பினார். இதுதொடர்பாக அளித்த புகாரின் பேரில், டிராக்டர் உரிமையாளர் ராகவன் என்பவரை பிடித்து போலீசார் விசாரணை நடத்தி வருகின்றனர்.