ஆதிக் அகமது கொலை சம்பவம் - பயிற்சி கொடுத்த 3 பேர் கைது

உத்தரப்பிரதேசத்தில், ஆதிக் அகமது கொல்லப்பட்ட வழக்கில், கொலையாளிகளுக்கு பயிற்சி கொடுத்த 3 பேரை போலீசார் கைது செய்துள்ளனர்.

5 முறை எம்.எல்.ஏ.வாகவும், நாடாளுமன்ற உறுப்பினராகவும் இருந்த அலகாபாத்தின் பெரிய கேங்க்ஸ்டரில் ஒருவரான அதிக் அகமது, அவரது சகோதரர் அஷ்ரப் அகமது ஆகியோர் சுட்டுக்கொல்லப்பட்ட சம்பவம் பரபரப்பை ஏற்படுத்தியது.

காவல்துறையினர் அருகில் இருந்தபோது நடந்த இந்த சம்பவத்தில், ஆதிக் அகமது மீதும், அஷ்ரப் மீதும் 36 தோட்டாக்கள் பொழிந்தன. இவ்வழக்கில் கொலையாளிகள் மூவரும் காவல்துறையிடம் சரணடைந்தனர். இந்நிலையில், பத்திரிகையாளர் போல் வேடமணிந்து வந்த கொலையாளிகளுக்கு பயிற்சி அளித்த 3 பேரை உத்தரப்பிரதேச போலீசார் கைது செய்து விசாரணை நடத்தி வருகின்றனர்.