"நீங்க சரிப்பட்டு வரமாட்டீங்க" தானாகவே பேருந்தை இயக்கிய காவலர் - மின் கம்பத்தில் மோதியதால் பரபரப்பு

நாமக்கல் மாவட்டம் ராசிபுரத்தில், தனியார் பேருந்தை தன்னிச்சையாக இயக்கி விபத்துக்குள்ளாக்கிய போக்குவரத்து காவல் உதவி ஆய்வாளரால் பரபரப்பு ஏற்பட்டது.

ராசிபுரம் புதிய பேருந்து நிலையத்தில், நேர பிரச்னை தொடர்பாக, அரசு மற்றும் தனியார் பேருந்து ஓட்டுனர்கள், நடத்துநர்களுக்கு இடையே வாக்குவாதம் ஏற்பட்டது. தகவலறிந்து சம்பவ இடத்துக்கு சென்ற போக்குவரத்து காவல் உதவி ஆய்வாளர் நடராஜன் என்பவர், இரு தரப்பினர்களிடம் பேச்சுவார்த்தை நடத்தினார். மேலும், அரசு மற்றும் தனியார் பேருந்துகளை எடுக்கக் கோரிய நிலையில், தனியார் பேருந்து ஓட்டுநர் மறுப்பு தெரிவித்ததாக கூறப்படுகிறது. இதனால், தனியார் பேருந்தை தன்னிசையாக இயக்கிய காவல் உதவி காவல் ஆய்வாளர் நடராஜன், காவல் நிலையம் அருகே பெட்ரோல் பங்கில் நிறுத்த முயன்ற போது, மின் கம்பத்தில் மோதி பேருந்து விபத்துக்குள்ளானது. உடனடியாக சம்பவ இடத்துக்கு வந்த பேருந்து உரிமையாளர், போக்குவரத்து காவல் உதவி ஆய்வாளரை சரமாரியாக கேள்வி எழுப்பி, வாக்குவாதத்தில் ஈடுபட்டார்.