உல்லாசத்துக்கு இடைஞ்சல்... கணவனை கொன்று புதைத்து... மேலே ரோடு போட்ட கொடுமை - சிக்கிய மனைவிW

திருவிடைமருதூர் அடுத்த திருப்பனந்தாள் பகுதியை சேர்ந்த பாரதி - திவ்யா தம்பதிக்கு, 2 பிள்ளைகள் உள்ளன. சென்னையில் தங்கியிருந்து டீக்கடை ஒன்றில் பணியாற்றி வந்த பாரதி, மாத சம்பளத்தை வீட்டிற்கு அனுப்பி வந்துள்ளார். சில சமயங்களில் பாரதி சொந்த ஊர் வந்து குடும்பத்துடன் இருக்கும்போது, கணவன் மனைவிக்கு இடையே அடிக்கடி தகராறு ஏற்பட்டு வந்ததாக கூறப்படுகிறது. கடந்த மாதம் கோவில் திருவிழாவுக்காக பாரதி சொந்த ஊருக்கு மீண்டும் வந்துள்ளார். வழக்கம்போல கணவன் மனைவிக்கும் இடையே தகராறு ஏற்படவே, திடீரென பாரதி காணாமல் போயுள்ளார். கணவன் மாயமானதை மனைவி திவ்யா கண்டுகொள்ளாத நிலையில், சந்தேகம் அடைந்த பாரதியின் உறவினர், காணாமல்​ போனவரை கண்டுபிடித்து தருமாறு காவல்நிலையத்தில் புகார் அளித்துள்ளார்.

அதனைத் தொடர்ந்து போலீசார் வழக்குப்பதிவு செய்து பாரதியை தேடி வந்த நிலையில், பாரதியின் மனைவி திவ்யாவின் நடவடிக்கைகள் மீது போலீசாருக்கும் சந்தேகம் எழுந்தது. பின்னர் திவ்யாவை அழைத்து, போலீசார் தங்களது பாணியில் விசாரணை நடத்தியபோது, பல அதிர்ச்சி தகவல்கள் வெளியாகின. திவ்யாவும், கீழ்மாந்தூர் ஜே.ஆர்.ஜே. நகர் பகுதியை சேர்ந்த டேவிட் என்கிற சதீஷ்குமார் என்பவரும் தகாத உறவில் இருந்து வந்தது தெரியவந்தது. இவர்களின் தகாத உறவை பாரதி கண்டித்ததால், இருவரும் சேர்ந்து அவரது கழுத்தை நெறித்துக் கொன்றது விசாரணையில் அதிர்ச்சியை ஏற்படுத்தியது.அதன் பிறகு, தஞ்சாவூர் விக்கிரவாண்டி சாலை விரிவாக்க பணியில், சாலையில் மண் கொட்டும் சூப்பர்வைசராக பணியாற்றிய சதீஷ்குமார், வீட்டில் வைக்கப்பட்டிருந்த பாரதியின் உடலை சாக்குமூட்டையில் கட்டி, மினி வேன் மூலம் எடுத்து வந்து சாலை போடும் இடத்தில் குழி தோண்டி புதைத்துள்ளார். அதனைத் தொடர்ந்து, மண் கொட்டப்பட்டுள்ளதாக நினைத்து அதன் மீது சாலை போடப்பட்டது விசாரணையில் தெரியவந்தது.

இதனையடுத்து, திவ்யா மற்றும் சதீஷ்குமாரை கைது செய்த போலீசார், புதிதாக போடப்பட்ட சாலையில், புதைக்கப்பட்ட பாரதியின் உடலை தோண்டி எடுத்தனர். பின்னர் அங்கேயே உடலுக்கு உடற்கூறு ஆய்வு செய்யப்பட்டது. அப்போது உடலைக் காண நூற்றுக்கும் மேற்பட்டோர் குவிந்ததால் பரபரப்பு ஏற்பட்டது.கள்ளக்காதலனோடு சேர்ந்து கணவனை, மனைவியே தீர்த்து கட்டி புதைத்த சம்பவம், திருவிடைமருதூர் பகுதியில் பரபரப்பை ஏற்படுத்தியுள்ளது.