மது போதையில் ஹோட்டலில் ரகளை செய்த திருநங்கைகள் - பரபரப்பு சிசிடிவி காட்சி

திருச்சி மாவட்டம் துறையூரில், கடைகளில் பண வசூல் செய்து, ரகளையில் ஈடுபட்ட திருநங்கைகள் மீது, காவல்நிலையத்தில் புகார் அளிக்கப்பட்டுள்ளது.

துறையூர் மற்றும் சுற்றுப்புற பகுதிகளை சேர்ந்த திருநங்கைகள் 4 பேர், சிவராத்திரியை முன்னிட்டு, அங்குள்ள கடைகளில் நன்கொடை வசூல் செய்துள்ளனர்.

அப்போது அருகில் இருந்த மதுபான கடையில் மது அருந்திவிட்டு, மதுப்பிரியர்களிடமும் வசூல் வேட்டையில் ஈடுபட்டுள்ளனர்.

இந்த நிலையில், பாலக்கரை பகுதியில் உள்ள ஃபாஸ்ட் ஃபுட் கடையில், திருநங்கைகள் நன்கொடை கேட்டுள்ளனர்.

உணவக உரிமையாளர் பணம் தர மறுத்ததால், ஆத்திரமடைந்த அவர்கள், உணவகத்தில் இருந்த மேசை, நாற்காலியை தூக்கி எறிந்ததுடன், உரிமையாளரையும் தாக்கியுள்ளனர்.

இதில் காயமடைந்த உரிமையாளர் மருத்துவமனையில் அனுமதிக்கப்பட்ட நிலையில், இதுதொடர்பாக காவல்நிலையத்தில் புகார் அளிக்கப்பட்டுள்ளது.