"இரவு 8 மணிக்கு மேல் வீட்டுக்கு வருமாறு அழைப்பார்".. புகார் அளித்த ரஷ்யா முன்னாள் மாணவி

ரஷ்யாவை சேர்ந்த முன்னாள் மாணவி ஒருவர், கலாஷேத்ராவில் படித்த போது பாலியல் தொல்லைக்கு ஆளாக்கப்பட்டதாக மாநில மகளிர் ஆணையத்தில் புகாரளித்திருப்பது சர்ச்சையை ஏற்படுத்தி இருக்கிறது..

கலாஷேத்ராவில் மாணவிகள் பாலியல் தொல்லைகளுக்கு ஆளாக்கப்பட்ட புகாரும், கல்லூரி வளாகத்தில் நடைபெற்ற போராட்டமும் தமிழகத்தில் பெரும் பரபரப்பை ஏற்படுத்தியது. இந்த விவகாரத்தில் மாநில மகளிர் ஆணையம் தலையிட்டு விசாரணை நடத்தி வரும் நிலையில், கலாஷேத்ராவில் படித்த முன்னாள் மாணவியான ரஷ்யாவை சேர்ந்த பெண் ஒருவர் மாநில மகளிர் ஆணையத்தில் புகாரளித்துள்ளார். கலாஷேத்ராவின் விடுதியில் தங்கி படித்த முதல் ஆறு மாதத்திலேயே தான் பாலியல் தொல்லைக்கு ஆளாக்கப்பட்டதாக அவர் மின்னஞ்சல் வாயிலாக புகாரளித்துள்ளார். இரவு 8 மணிக்கு மேல் பேராசிரியர் ஒருவர் அவரின் இல்லத்திற்கு வருமாறு தன்னை கட்டாயபடுத்தியதாகவும், நடன பயிற்சியின் போது தன்னிடம் தவறாக நடந்து கொண்டதாகவும் குறிப்பிட்டுள்ளார்.... மதிப்பெண்ணை குறைத்து விடுவேன் என மிரட்டுவதோடு தன்னிடம் அட்ஜஸ்ட் செய்து போகவேண்டும் என நிர்பந்திக்கப்பட்டதாக ரஷ்ய பெண் அளித்திருக்கும் குற்றச்சாட்டு பரபரப்பை ஏற்படுத்தி இருக்கிறது.