அதிமுக பொதுச்செயலாளர் ஈபிஎஸ் என்று முழக்கம் எழுப்பிய ஆதரவாளர்கள் | Edappadi Palaniswami

திருவண்ணாமலை அருகே, அதிமுக இணை ஒருங்கிணைப்பாளர் எடப்பாடி பழனிசாமிக்கு அக்கட்சியினர் பூத்தூவி உற்சாக வரவேற்பு அளித்தனர்.

அதிமுகவில் ஒற்றைத் தலைமை விவகாரம் விஸ்வரூபம் எடுத்துள்ள நிலையில், எடப்பாடி பழனிசாமி சேலத்தில் தங்கியுள்ளார். ஆரணி அருகே நடைபெறும் கோயில் கும்பாபிஷேக நிகழ்ச்சியில் கலந்துகொள்வதற்காக, திருவண்ணாமலை வழியாக வந்தார். அப்போது, காட்டாம்பூண்டி பகுதியில் கார் மீது பூக்களை தூவியும், மலர்க்கொத்துக்களை கொடுத்தும், எடப்படி பழனிசாமிக்கு அதிமுகவினர் உற்சாக வரவேற்பு அளித்தனர். மேலும், அதிமுக பொதுச்செயலாளர் ஈபிஎஸ் என்றும் அவர்கள் முழக்கம் எழுப்பினர். அதிமுகவில் இரட்டைத் தலைமையே நீடிக்கும் என ஓ.பன்னீர்செல்வம் தெரிவித்துள்ள நிலையில், எடப்பாடி பழனிசாமியை, பொதுச்செயலாளர் என குறிப்பிட்டு அவரது ஆதரவாளர்கள் முழக்கம் எழுப்பி வருகின்றனர்.