சாப்பாட்டில் வினோத `வாசனை'- ஒரு நொடியில் கண்டுபிடித்த பெண்- விஷம் கலந்து கொல்ல நினைத்தது யார்?

குடும்பத்தகராறு காரணமாக மனைவி, குழந்தைகளை விஷம் வைத்து கொலை செய்ய முயன்ற நபர் கைது செய்யப்பட்டார்.

ஒசூர் அருகே பூதிட்டி கொட்டாய் கிராமத்தை சேர்ந்த தம்பதி, கரியப்பா மற்றும் சாந்தி. இவர்களுக்கு மூன்று குழந்தைகள் உள்ளது. கரியப்பாவுக்கு மதுப்பழக்கம் இருப்பதால், மனைவி சாந்தியிடம் அடிக்கடி குடிக்க பணம் கேட்டு தொந்தரவு செய்துள்ளார். பணம் தர மறுக்கவே, சாந்தியை கரியப்பா தாக்கியுள்ளார். இதனால் குழந்தைகளுடன் வீட்டை விட்டு வெளியேறிய சாந்தி, மறுநாள் காலை வீட்டுக்கு வந்து சமைத்துள்ளார். ஆத்திரத்தில் இருந்த கரியப்பா, சாப்பாட்டில் விஷத்தை கலந்துவிட்டு வெளியேறியதாக கூறப்படுகிறது. சாந்தி தனக்கும், குழந்தைகளுக்கும் சாப்பாடு போட்டபோது, வித்தியாசமான வாசனை வந்துள்ளது. இதனையடுத்து ஆராய்ந்ததில் விஷம் கலக்கப்பட்டதும் தெரியவந்தது. நல்வாய்ப்பாக யாரும் எதையும் சாப்பிடவில்லை. இதுகுறித்து சாந்தி கொடுத்த புகாரின் பேரில், கரியப்பா கைது செய்யப்பட்டுள்ளார்.