பள்ளி மாணவிகளுக்கு செக்ஸ் டார்ச்சர் கொடுத்த நாதக நிர்வாகி - "பப்பாளி, அண்ணாச்சி பழம் சாப்பிடுங்கள்"

பர்கூர் அடுத்த காந்தி குப்பம் அருகே தனியார் பள்ளி ஒன்று செயல்பட்டு வருகிறது. இப்பள்ளி மாணவர்களுக்கு, நாம் தமிழர் கட்சியின் கிருஷ்ணகிரி மாவட்ட இளைஞர் பாசறை செயலாளராக இருந்த சிவராமன் என்பவர் என்.எஸ்.எஸ் முகாம் குறித்து பயிற்சி அளித்துள்ளார். இந்நிலையில், பள்ளி மாணவிகளிடம் சிவராமன் பாலியல் ரீதியாகவும் அத்துமீறியதாகவும், தொடர்ந்து மாணவிகளை மிரட்டி பாலியல் தொல்லைகள் கொடுத்து வந்ததாகவும் குற்றம் சுமத்தப்பட்டது. இது குறித்து ஆசிரியைகளிடம் தெரிவித்த மாணவிகளை, ஆசிரியர்கள் பப்பாளிப் பழமும், அண்ணாச்சி பழமும் சாப்பிடுமாறு அறிவுறுத்தியதாகவும் கூறப்படுகிறது. இந்நிலையில், இந்த விவகாரம் பெற்றோர்களுக்கு தெரியவர, போலீசில் புகார் அளித்துள்ளனர். தொடர்ந்து, பள்ளியில் ஆய்வு நடத்திய அதிகாரிகள், பள்ளி மாணவர்கள் மற்றும் ஆசிரியர்களிடம் விசாரணை நடத்தியுள்ளனர். விசாரணையில் பள்ளி நிர்வாகம் முன்னுக்கு பின் முரணாக பதிலளித்ததை அடுத்து, பள்ளி ஆசிரியர்கள் உட்பட 5 பேரை கைது செய்திருக்கும் போலீசார், தலைமறைவாக உள்ள சிவராமனை வலைவீசி தேடிவருகின்றனர். மேலும், இந்த சம்பவத்துக்கு பிறகு நாம் தமிழர் கட்சியில் இருந்து சிவராமன் நீக்கப்பட்டதும் குறிப்பிடத்தக்கது.