அமெரிக்காவில் 53 வருடம் பார்க்காத விஷயத்தை பார்த்து வியந்ததாக கூறிய டாக்டர்

அமெரிக்கா சுற்றுப்பயணம் மேற்கொண்டுள்ள முதலமைச்சர் மு.க.ஸ்டாலின் சிகாகோவில் அமெரிக்கவாழ் தமிழர்களை சந்தித்தது நெகிழ்ச்சியை ஏற்படுத்தியதாக அங்கு வசிக்கும் மருத்துவர் சோம இளங்கோவன் கூறியுள்ளார்.அமெரிக்காவில் 53 ஆண்டுகளாக வசித்து வரும் புகழ்பெற்ற மருத்துவர் சோம இளங்கோவன் வெளியிட்டுள்ள அறிக்கையில், நிகழ்ச்சிக்கு அமெரிக்காவின் பல மாநிலங்களில் இருந்து தமிழர்கள் திரண்டு வந்து பங்கேற்றனர் என்றும், தனக்குத் தெரிந்து 53 ஆண்டுகளில் சிகாகோ விமான நிலையத்தில் இப்படி ஒரு வரவேற்பு நிகழ்ந்ததில்லை என்றும் கூறியுள்ளார். "உங்கள் குடும்பத்தில் ஒருவர் தமிழ்நாட்டு முதலமைச்சராக இருக்கிறார் என்று உங்கள் குழந்தைகளுக்குச் சொல்லுங்கள்" என்றதும் தமிழர்களின் ஆரவாரம் பெரிய அரங்கத்தையே குலுக்கியது என்றும் அவர் குறிப்பிட்டுள்ளார். "திராவிட மாடல்" உலகறியும் கோட்பாடு ஆகியுள்ளது என்றும், தமிழரின் பொற்காலம் தொடங்கி விட்டதாகவும் அவர் நெகிழ்ச்சி தெரிவித்துள்ளார்.