வழுக்கை தலையில் விக் வைத்து வகை வகையாய் ஆட்டையை போட்ட திருடன்... தானாக வந்து வலையில் விழுந்த ஆடு

வழுக்கை தலையில் விதவிதமாக விக் அணிந்து மாறுவேடத்தில் தொடர் திருட்டில் ஈடுபட்ட ஆசாமி கைது செய்யப்பட்டார்...

வேலூர் மாவட்டம் குடியாத்தம் மற்றும் சுற்றுவட்டார பகுதிகளில் கடந்த சில நாள்களாக தொடர்ந்து குற்ற சம்பவங்கள் அதிகரித்த நிலையில் கண்காணிப்பு தீவிரப்படுத்தப்பட்டது. போலீசார் குடியாத்தம் அடுத்த கார்த்திகேயபுரம் பேருந்து நிலையம் அருகே வாகனத் தணிக்கையில் ஈடுபட்டு இருந்தனர். அப்போது பைக்கில் சந்தேகத்திற்கிடமான வகையில் வந்த நபரை பிடித்து விசாரணை மேற்கொண்டதில் அவர் முண்ணுக்குப் பின் முரணாக பதில் அளித்துள்ளார்... தொடர்ந்து காவல் நிலையம் அழைத்துச் சென்று விசாரித்ததில், அவர் காடை மோகன் என்கிற மோகன் என்பதும் ஏற்கனவே கொலை மற்றும் கொள்ளை சம்பவங்களில் ஈடுபட்டு பல முறை சிறைக்குச் சென்று வந்ததும், 30க்கும் மேற்பட்ட குற்ற வழக்குகள் பல்வேறு காவல் நிலையங்களில் நிலுவையில் உள்ளதும் தெரிய வந்தது... சென்னராயனப்பள்ளி பகுதியில் கடந்த சில நாள்களுக்கு முன்பு பள்ளி முதல்வர் வீட்டில் திருடியதும், பசுமாத்துர் மற்றும் வளத்தூர் பகுதிகளில் திருடியதும் தெரிய வந்துள்ளது... மோகனிடம் இருந்து 56 கிராம் தங்கம், 500 கிராம் வெள்ளி, இருசக்கர வாகனம் எல் இ டி டிவி, கடிகாரம், கேஸ் ஸ்டவ் உள்ளிட்ட பொருட்களை பறிமுதல் செய்து கைது செய்து தீவிர விசாரணை மேற்கொண்டுள்ளனர் போலீசார்... தனது வழுக்கைத் தலையில் விக் வைத்து விதவிதமான கெட் அப்புகளில் தோன்றியதால் மோகனைக் கண்டறிவதில் போலீசாருக்கு சிரமம் ஏற்பட்டது குறிப்பிடத்தக்கது.