'இல்லம் தேடி கல்வி' - புதிய திட்டம் - முதலமைச்சருடன் அன்பில் மகேஷ் ஆலோசனை

கொரோனா ஊரடங்கு காலத்தில் பள்ளிகள் திறக்காத நிலையில், அரசுப் பள்ளி மாணவர்களுக்கு கல்வித் தொலைக்காட்சி மூலம் பாடம் நடத்தப்பட்டது. இந்நிலையில், அரசு பள்ளி மாணவர்களிடையே கற்றல் குறைபாடு இருப்பது கண்டறியப்பட்டது. மாணவர்களின் கற்றல் குறைபாடுகளை தீர்க்க பள்ளிக்கல்வித்துறை நடவடிக்கை மேற்கொண்டுள்ளது. அதன்படி, 8ஆம் வகுப்பு வரை அரசுப் பள்ளிகளில் படிக்கும் மாணவர்களிடையே கற்றல் இடைவெளியை குறைப்பதற்காக 'இல்லம் தேடி கல்வி' என்கிற திட்டத்தை தமிழக அரசு செயல்படுத்தப்பட உள்ளது. தன்னார்வலர்களைக் கொண்டு செயல்படுத்தப்படும் இந்த திட்டம் குறித்து முதலமைச்சர் ஸ்டாலினுடன் அமைச்சர் அன்பில் மகேஷ் பொய்யாமொழி ஆலோசனை மேற்கொண்டார். சென்னை தலைமை செயலகத்தில் நடைப்பெற்ற ஆலோசனையில், பள்ளிக்கல்வித்துறை செயலாளர் காகர்லா உஷா, ஆணையர் நந்தக்குமார் உள்ளிட்டோர் பங்கேற்றனர்.