தங்கம் விலை சவரனுக்கு ரூ.328 குறைவு

தங்கத்தின் விலை இன்று ஒரு சவரனுக்கு 328 ரூபாய் குறைந்து 29 ஆயிரத்து 600 ரூபாயாக விற்பனை ஆகிறது. கடந்த இரண்டு நாட்களுக்கு முன் 30 ஆயிரம் ரூபாய்க்கு மேல் புதிய உச்சத்தைத் தொட்ட தங்கத்தின் விலை கடந்த இரண்டு நாட்களாக குறைந்துள்ளது.  நேற்று 29 ஆயிரத்து 928 ரூபாயில் இருந்த தங்க விலை நிலவரம், இன்று ஒரு கிராமிற்கு ரூ.41 குறைந்து, சவரன் 29 ஆயிரத்து 600 ரூபாயாக விற்பனை ஆகிறது. இந்த நிலையில், மாலை நிலவரப்படி தங்கம் விலை மேலும் குறையும் என்கிற எதிர்பார்ப்பு வர்த்தகர்கள் மத்தியில் நிலவி வருகிறது. பண்டிகை காலம் தொடங்கியுள்ளதால், தங்கம் விலை தொடர்ந்து குறைய வேண்டும் என்பது மக்களின் எதிர்பார்ப்பாக உள்ளது. டாலருக்கு நிகரான ரூபாய் மதிப்பு சீராக இருக்கும் நிலையில், சர்வதேச அளவில் முக்கிய பங்குச் சந்தைகளும் ஏற்றத்தை கண்டுள்ளதால் தங்கம் விலை குறைந்துள்ளதாக சந்தை வல்லுநர்கள் கூறியுள்ளனர்.