டி.என்.பி.எல். 5வது சீசன் கிரிக்கெட் தொடர் - 3-வது முறையாக கோப்பையை வென்றது சேப்பாக்

டி.என்.பி.எல் தொடரின் சாம்பியன் பட்டத்தை, 3ஆவது முறையாக சேப்பாக் சூப்பர் கில்லீஸ் அணி வென்றது. டி.என்.பி.எல் கிரிக்கெட்டின் 5ஆவது சீசன் தொடர் கடந்த மாதம் 19ஆம் தேதி தொடங்கியது. அனைத்து போட்டிகளும் சென்னையிலேயே நடைபெற்றது. நேற்று நடந்த இறுதி போட்டியில் சேப்பாக் சூப்பர் கில்லீஸ் மற்றும் திருச்சி வாரியர்ஸ் அணிகள் பலப்பரீட்சை நடத்தின. இதில், முதலில் பேட்டிங் செய்த சேப்பாக் அணி 20 ஓவர்கள் முடிவில் 183 ரன்கள் குவித்த‌து. அதிரடியாக விளையாடிய தொடக்க ஆட்டக்காரர் நாராயண் ஜெகதீசன் 58 பந்துகளில் 90 ரன்கள் சேர்த்தார். பின்னர் களமிறங்கிய திருச்சி வாரியர்ஸ் அணி, வெற்றிக்காக போராடிய நிலையில் 175 ரன்கள் மட்டுமே எடுத்த‌து. இதன் மூலம் சேப்பாக் சூப்பர் கில்லீஸ் அணி 8 ரன்கள் வித்தியாசத்தில் வெற்றி பெற்று, மூன்றாவது முறையாக கோப்பையை கைப்பற்றியது. இதற்கு முன்பு 2017 மற்றும் 2019ஆம் ஆண்டுகளில் சேப்பாக் அணி டி.என்.பி.எல் கோப்பையை வென்றது குறிப்பிடத்தக்கது.