டி.என்.பி.எல். கிரிக்கெட் போட்டி - காஞ்சி வீரன்ஸ் அணி அபார வெற்றி

திண்டுக்கல் மாவட்டம், நத்தம் NPR கல்லூரி மைதானத்தில் நடைபெற்ற  டி.என்.பி.எல் கிரிக்கெட் போட்டியில் , காரைக்குடி காளை அணியும், காஞ்சி வீரன்ஸ் அணியும்  மோதின. டாஸ் வென்ற காரைக்குடி காளை அணி பந்துவீச்சு தேர்வு செய்தது. இதனையடுத்து முதலில் பேட் செய்த காஞ்சி வீரன்ஸ் அணி, 20 ஓவர்கள் முடிவில் 4 விக்கெட்  இழப்பிற்கு 177 ரன்கள் எடுத்தது. அதிகபட்சமாக சஞ்சய் யாதவ் 60 பந்துகளில் 95 ரன்களை எடுத்தார். இதனை தொடர்ந்து,  178 ரன்கள் வெற்றி இலக்குடன் விளையாடிய காரைக்குடி காளை அணி தொடக்கம் முதலே அடுத்தடுத்து விக்கெட்டுகளை பறிகொடுத்தது.  காரைக்குடி காளை அணி 14 புள்ளி 4 ஓவரில் அனைத்து விக்கெட்டுகளையும் இழந்து 69 ரன்கள் மட்டுமே எடுத்தது. இதையடுத்து காஞ்சி வீரன்ஸ் அணி 110 ரன்கள் வித்தியாசத்தில் அபார வெற்றி பெற்றது. அதிகபட்சமாக சுதீஸ் 4 விக்கெட்டுகளை வீழ்த்தினார்.