பைக்கை திருடி ஓட்ட தெரியாமல் திருடன் செய்யும் வேலை - சிசிடிவியில் சிக்கிய காட்சிகள்

புதுச்சேரியில் இருசக்கர வாகனத்தை திருடிய திருடன் அதனை ஓட்ட தெரியாமல் வாகனத்தின் மேல் அமர்ந்து கொண்டு தள்ளி செல்லும் சிசிடிவி காட்சி வெளியாகியுள்ளது. புதுச்சேரி, ரெயின்போ நகர் பகுதியை சேர்ந்த தீனதயாளன் என்பவர் தனது இருசக்கர வாகனத்தை காணவில்லை என புகார் அளித்துள்ளார். இதனை தொடர்ந்து அப்பகுதியில் பொருத்தப்பட்டிருந்த கண்காணிப்பு கேமராக்களை போலீசார் ஆய்வு செய்தனர். அதில் 40 வயது மதிக்கத்தக்க நபர் ஒருவர் தீனதயாளன் வாகனத்தின் மேல் அமர்ந்து கொண்டு ஒற்றை காலால் வாகனத்தை தள்ளிச்செல்வது பதிவாகி இருந்தது. அதனைத் தொடர்ந்து மற்ற வீதிகளில் உள்ள கண்காணிப்பு கேமிராக்களை பார்த்த போதும் அதே போல் காலால் தள்ளிச்செல்லும் காட்சிகளே பதிவாகி இருந்தது. இதில் அவருக்கு வாகன ஓட்ட தெரியாமல் தள்ளிக்கொண்டே திருடிச் செல்வது தெரிய வந்த நிலையில், அவரை போலீசார் தேடி வருகின்றனர்.